بەرهەمهێنانی کارەبا لە کێڵگەی خورمەڵە نزیکەی 500 مێگاوات زیاد دەکات

ئاڤا نیوز

بەهۆی زیادبوونی بەرهەمهێنانی مێگاواتی کارەبا لە وێستگەی غازی خورمەڵە، لە هاوین و زستان کاتژمێرێک و لە بەهار و پایز دوو کاتژمێر کارەبای نیشتمانی زیاد دەکات.

وێنە گەورەکە: لە هەرێمی کوردستان لەپاڵ سەرچاوەی ئاو بۆ بەرهەمهێنانی کارەبا، ژێرخانی بەشی هەرە زۆری بەرهەمهێنانی کارەبا لەڕێگەی غازەوە دابین دەکرێت.

لێدوانی فەرمی: ئومێد محەممەد، وتەبێژی وەزارەتی کارەبا بە ئاڤا میدیای ڕاگەیاند: ڕێژەی لە %70ـی کارەکانی زیادکردنی نزیکەی 500 مێگاواتەکەی خورمەڵە تەواوبووە، لە  ناوەڕاستی ئەم مانگە تەواوی کارەکانی کۆتایی دێت و بەم هۆیەوە کاتژمێرێک کارەبای نیشتمانی زیاد دەکات.

بۆچی گرنگە: بەوتەی کەمال محەممەد، وەزیری کارەبای حکومەتی هەرێمی کوردستان کە هەفتەی ڕابردوو ڕایگەیاند، ئێستا ئاستی بەرهەمهێنانی کارەبا هەشت هەزار و 189 مێگاواتە. بەو 500 مێگاواتەی خورمەڵە ئاستی دابینکردنی کارەبا دەگاتە قۆناغێکی دیکە.

 

ئەمەش بزانە: لەکاتێکدایە بەهۆی چاکسازیکردن لە کێڵگەی غازی کۆرمۆر، کار لەسەر ئەوە ئەکرێت تاوەکو کۆتایی ئەمساڵ بڕی هەزار و 300 مێگاواتی دیکە کارە زیاد بکات، بەمەش توانای هەرێمی کوردستان بۆ بەرهەمهێنانی کارەبا دەگاتە زیاتر لە 10 هەزار مێگاوات.