شایستە داراییەکانی فەرمانبەرانی گرێبەست لە سۆران خەرج دەکرێت

ئاڤا نیوز

ئەم مانگە دوای تەمویلی مووچە، شایستە داراییەکانی فەرمانبەرانی گرێبەست لە ئیدارەی سەربەخۆی سۆران خەرج دەکرێت.

وێنە گەورەکە: بەمەبەستی پڕکردنەوەی بۆشایی نێو فەرمانگە حکومییەکان، سێ هەزار و 200 کەس لە مانگەکانی ڕابردوودا لەسەر داهاتی ناوخۆ بە گرێبەست دامەزراون، بەڵام بەهۆی نەبوونی نەختینە، مانگانە لە کاتی خۆی شایستە داراییەکانیان وەرناگرن، بەشێکیان نزیکەی هەشت مانگە هیچ پارەیەکیان وەرنەگرتووە. لەم سێ هەزار و 200 کەسە 330 کەسیان لە سنووری ئیدارەی سەربەخۆی سۆرانن.

لێدوانی فەرمی: سەرچاوەیەکی باڵا لە وەزارەتی دارایی و ئابووری هەرێمی کوردستان بە ئاڤای گوت، لەم مانگە ئەو فەرمانبەرە گرێبەستانە شایستە داراییەکانیان وەردەگرن و تەواوی ڕێکارەکان گیراونەتە بەر.

لەلایەکی دیکەوە: گەنجینەی سۆران بە ئاڤا میدیای وت، تا ئێستا بڕیار نەدراوە هەموو مانگەکان پێکەوە خەرج دەکرێت یاخود نا، چەند میکانیزمێک پێشنیاز کراوە. یان بە دوو قۆناغ پارەکەیان وەرگرن یان مانگانە دوو شایستە داراییان بۆ خەرج بکرێت، بەگوێرەی پارەی بەردەست دەبێت و هیچ شایستەیەکیان نافەوتێت.