ئاڤا یەکێک لە گەندەڵییە گەورەکانی عێراق ئاشکرا دەکات

ئاڤا نیوز

پەرلەمانتارێکی عێراق، گەندەڵیەکی گەورە ئاشکرا دەکات کە لەماوەی شەش ساڵ کراوە، لەو ماوەیەدا یەک ترلیۆن و هەشتا ملیار دینار لە خەزینەی حکومەت ڕۆیشتووە، لە گەندەڵیەکە تیرۆرست مووچەی شەهیدانەی بۆ بڕاوەتەوە.

چیرۆکی سەرەکی: تۆڕێکی گەورە و بە شێوەیەکی ڕێکخراو لەنێو دامەزراوە جیاوازەکانی حکومەتی عێراق هەستاون بە دەستکاریکردن و ساختەکردنی هەزاران نووسراو لە پزیشکی دادی، دەزگای شەهیدان، دەستەی گشتی خانشینی عێراق، لەم دەزگایانە تیرۆرست و داواکراو خانشینکراون بە شەهید.

لێدوانی فەرمی: دەروون مەلا ناجی، پەیامنێری ئاڤا لە بەغدا قسەی لەگەڵ ئەمری مەعمووری، پەرلەمانتاری سەربەخۆ لەسەر پارێزگای بابل کردووە و  ڕاگەیاند: چەند ساڵێکە بە دوادا چوونی وردی بۆ کردووە. لە نێوان ساڵی 2018 تا 2024، بایی یەک ترلیۆن و هەشتا ملیار دینار گەندەڵی کراوە، لە دەستکاریکردن و ساختەکردنی نوسراو لە پزیشکی دادی و فەرمانگەکانی تر، کە ژمارەیەکی زۆری تیرۆرست و داواکراو بە شەهید خانەنشین کراون.

زانیاریی زیاتر: بەگوتەی ئەو پەرلەمانتارە، زەوییان لە باشترین شوێن پێدراوە و منداڵیان لە باشترین زانکۆ دەخوێنن و لە باشترین وەزارەتەکان دامەزراون، واتە ئیمتیازاتی خانەنشینی و شەهیدانەیان وەرگرتووە.

ئەو پەرمانتارە نموونەی هێناوەتەوە و دەڵێت؛ تیرۆرست هەبووە حەوت ئۆتۆمبێلی لە چەند ناوچەیەکی جیاوازی عێراق تەقاندووەتەوە، لە دوای ئەوەی لە لایەن هێزە ئەمنییەکانەوە کوژراوە، مامەلەی شەهیدی بۆ کراوە و چەند ساڵێکە مووچەی شەهیدانە وەردەگرێت.

لەلایەکی دیکەوە: لیژنەیەکی باڵا بۆ لێکۆڵینەوە لەو گەندەڵییە لە چەند دامەزراوەیەکی جیاواز پێکهێنراوە. چەند مانگێکە دەستبەکار بووە. لە ئەنجامی لێکۆڵینەوە لەم ماوەیە دەرکەوتووە تەنها لە یەک پارێزگای عێراق 17 هەزار نووسراو و ڕاپۆرتی جیاواز بۆ ئەم ساختەکارییە کراون و بەدواداچوون بەردەوامە.