بارانی ئەمڕۆ زیانی بە قوتابخانەیەک و دەیان دۆنم زەوی چۆمان گەیاند

ئاڤا نیوز

باران و تەرزە بەخوڕەکەی ئەمڕۆ بێ زیان تێنەپەڕی. لە ناحیەی سمیلانی سەر بە قەزای چۆمان قوتابخانەیەک و دەیان دۆنم زەوی دووچاری زیان کردووە.

وێنە گەورەکە: ئەگەرچی لە سەنتەری شارەکان کەشەکە بە تەواوی گەرمی کردووە و تەنانەت لە هەندێ ناوچە دروێنەش دەستی پێکردووە، بەڵام شارەزایانی کەشناسی دەڵێن بارانی ئەم کاتانە جگە لەوەی زیانی بۆ کشتوکاڵ هەیە، بۆ گەنمیش زیانی زۆرە.

لێدوانی فەرمی: شاخەوان وەرتی، بەڕێوەبەری ناحیەی سمیلان بە ئاڤا میدیای وت: بەهۆی بارینی تەرزە ڕێگە کشتوکاڵییەکان، ڕەز و باخەکان زیانێکی زۆریان پێگەیشتووە بە دەیان دۆنم دەخەمڵێنرێت، بەشێک لە جووتیارانیش بەهۆی خراپبوونی ڕێگا کشتوکاڵییەکان ناتوانن زەوییەکانیان پاک بکەنەوە. جگە لەوە زیانێکی زۆر بەر قوتابخانەیەکیش کەوتووە.

شاخەوان وەرتی ئەمانەشی وت:

٠ بەهێزی بارانەکە هۆکار بووە کە نەتوانراوە ڕێرەوی ئاوەکە لەڕێی قوتابخانەکە لاببرێت، ئەمەش وای کرد قوتابخانەکە بەتەواوی ژێر ئاو بکەوێت. شوورەی قوتابخانەکە ڕووخاوە و دیواری پۆلەکان درزیان بردووە.

٠ قوتابخانەکە پێویستی بە نۆژەن کردنەوەیە، ئەگەر چارەسەرکردنی زیانەکان کاتێکی زۆری پێویست بێت قوتابیەکان دەنێرینە قوتابخانەیەکی تر.

چارەسەرەکان: ئەحمەد بارزان، قایمقامی قەزای چۆمان بە ئاڤا میدیای ڕاگەیاند: تیمی ئەندازە دەنێرینە قوتابخانەکە دوای خەمڵاندنی زەرەر و زیانەکان دەرخستەی بۆ دەکرێت و چاک دەکرێتەوە.

باکگراوند: ئەو قوتابخانەیەی زیانی بەرکەوتووە ناوی قوتابخانەی برایەتی چۆمانی بنەرەتی تێکەڵاوە، دەکەوێتە ناحیەی سمیلان، نۆ مامۆستا  و 20 قوتابی لە قوتابخانەکە هەن.