وەزارەتی کارەبای عێراق گرێبەست لەگەڵ ژمارەیەک کۆمپانیای نوێی دانانی سیستمی وزەی خۆر دەکات

ئاڤا نیوز

 

وەزارەتی کارەبای عێراق دەڵێت، گرێبەستی 16 کۆمپانیای دیکە لە چوارچێوەی بەرهەمهێنانی کارەبا بە وزەی خۆر لە قۆناغی مۆڵەت پێدانن، بەم ڕێککەوتنەش ژمارەی ئەو کۆمپانیایانەی بەشدارن لە دانانی سیستمەکە دەبێت بە 24 کۆمپانیا.

 

چیرۆکی سەرەکی: لە ناوەڕاستی مانگی ڕابردووەوە دەستپێشخەرییەکەی بانکی ناوەندی بۆ پاڵپشتی دانانی سیستمی بەرهەمهێنانی کارەبا بە تیشکی خۆر بڕی "ترلیۆنێک دینار" کارایە و ئێستا بۆ ماڵان تا 30 ملیۆن دینار قەرز دەدرێت، لە ماوەی حەوت ساڵیشدا پارەکە وەردەگیرێتەوە.

 

لێدوانی فەرمی: ئەحمەد موسا عەبادی، وتەبێژی وەزارەتی کارەبای عێراق ڕایگەیاند، لیژنەی تایبەتمەندی وەزارەتەکەیان وردبینیی بۆ گرێبەستی 16 کۆمپانیای دیکە کردووە کە داواکارییان پێشکەش کردبوو تا بەگوێرەی ڕێنماییەکان سیستمی بەرهەمهێنانی کارەبا بە وزەی خۆر بۆ ماڵان دابنێن، ئەوانیش بانکی ناوەندییان ئاگادارکردووەتەوە تا ئەو کۆمپانیایانەش بچنەناو پڕۆژەکەوە.

 

- بەوتەی ئەو بەرپرسەی وەزارەتی کارەبا سیستمی بەرهەمهێنانی کارەبا بە وزەی خۆر هەنگاوێکی گرنگە و فشار لەسەر تۆڕی کارەبای نیشتیمانی کەمدەکاتەوە.

 

لەلایەکی دیکەوە: د. ئامانج هەرکی، ئەندامی لیژنەی وزە لە پەرلەمانی عێراق بە ئاڤا میدیای ڕاگەیاند، وەک یەکەم هاووڵاتی عێراق و هەرێمی کوردستان ڕەزامەندی قەرزی بانکی ناوەندی بۆ دانانی سیستمی بەرهەمهێنانی وزە بە تیشکی خۆری وەرگرتووە، بڕیاریشە لەم چەند ڕۆژەدا کۆمپانیای تایبەت بە دانانی سیستمی  بەرهەمهێنانی وزە بە تیشکی خۆر بێن و سیستمەکە بۆ ماڵەکەی دابنێن.