خۆڵبارینێکی چڕ شارەکانی عێراقی گرتووەتەوە و هاتووچۆش شۆفێران ئاگادار دەکاتەوە

ئاڤا نیوز

 

شەپۆلێکی چڕی خۆڵبارین زۆربەی پارێزگاکانی باشوور و ناوەڕاستی عێراقی گرتووەتەوە، بەڕێوەبەرایەتی گشتیی هاتووچۆی عێراقیش چەند ڕێنماییەک بۆ شۆفێران دەردەکات.

 
وێنە گەورەکە: عێراق یه‌كێكه‌ له‌و وڵاتانه‌ی زۆرترین زیانی گۆڕانکاریی کەشوهەوای بەرکەوتووە، بەو هۆیەشەوە ساڵانە خۆڵبارینی چڕ ڕوو لە زۆربه‌ی پارێزگاکانی ناوەڕاست و باشوور دەکات.

 

ئەوەی ئێستا ڕوودەدات: شەپۆلێکی چڕی خۆڵبارین زۆربەی پارێزگاکانی باشوور و ناوەڕاستی عێراقی گرتووەتەوە، پێشتریش دەستەی گشتیی کەشناسی و چاودێریی بوومەلەرزەزانیش هۆشداری لە هاتنی ئەو شەپۆلە دابوو. 

 

ڕاگەیێنراوی فەرمی: بەڕێوەبەرایەتی گشتیی هاتووچۆی عێراق پاڵپشت بە ڕاپۆرتی دەستەی گشتیی کەشناسی و چاودێریی بوومەلەرزەزانی چەند ڕێنماییەکی بۆ شۆفێران دەرکرد بەهۆی ئەو شەپۆلە خۆڵبارینەی عێراقی گرتووەتەوە.

 

پێدراوە ڕاستییەكان: بەگوێرەی ڕاگەیێنراوەکە، وێنەی مانگە دەستکردەکان ئاماژە بە چالاکیی 'با'ـی ڕۆژئاوایی دەکەن، کە بووەتە هۆی دروستبوونی شەپۆلێکی چڕی خۆڵ و کەمبوونەوەی بەرچاوی مەودای بینین بەشێوەی ئاسۆیی بۆ کەمتر لە یەک کم لە هەندێک ناوچە، لەگەڵ ئەگەری درێژبوونەوەی شەپۆلەکە لە کاتژمێرەکانی ئێوارەدا بۆ ناوەڕاست و باشووری وڵات.

 

داواکاری فەرمی: هاتووچۆ داوا لە شۆفێران دەکات، "تاوەکو دەکرێت خێراییتان کەم بکەنەوە، گڵۆپە ئاگادارکەرەوەکان بەکاربهێنن، مەودایەکی پارێزگاری دروست لە نێوان ئۆتۆمبێلەکان جێبهێڵن و هاوکات لەکاتی نەمانی ئاستی بینین بە تەواوی بووەستن".

 

هۆکارە زانراوەکان: پێشتر عامر جابری، وتەبێژی دەستەی گشتیی کەشناسی و چاودێریی بومەلەرزەی عێراق هۆکاری ئەم شەپۆلە خۆڵبارینەی بۆ ئاڤا میدیا ئاشکرا کردبوو، هاوکات ئاماژەی بەوەدابوو، خۆڵبارین تاوەکو کۆتایی مانگی ئابی داهاتوو بەردەوام بێت.