کار لەسەر ئەوە دەکرێت عێراق برێکی زیاتری گەنمی جووتیارانی کوردستان وەربگرێت

ئاڤا نیوز

 

بەگوێرەی پلانی کشتوکاڵیی ئەمساڵ، وەزارەتی بازرگانیی عێراق بڕیاریداوە بڕی پێنج ملیۆن و 300 هەزار تۆن گەنم لە جووتیاران وەربگرێت، لەو بڕە 400 هەزار تۆن بۆ پارێزگاکانی هەرێمی کوردستان دانراوە و کار لەسەر زیادکردنی ئەو بڕە دەکرێت.

 

وێنه گەورەکە: وەزارەتی بازرگانی عێراق ساڵانە بڕێکی کەمی گەنمی جووتیارانی هەرێمی کوردستان وەردەگرێت، هاوشێوەی پارێزگاکانی دیکەی عێراق مامەڵەیان لەگەڵ ناکات، ساڵی ڕابردووش دوای هەوڵی سەرۆکوەزیران مەسرور بارزانی بڕەکەیان بۆ 700 هەزار تۆن زیاد کرا.

 

لێدوانی فەرمی: هیوا عەلی، گوتەبێژی وەزارەتی کشتوکاڵ و سەرچاوەکانی ئاو بە ئاڤای گوت، "بە نووسراوی فەرمی داواکاریمان پێشکەشی ئەنجوومەنی وەزیرانی هەرێمی کوردستان کردووە، بۆ ئەوەی هەماهەنگی لەگەڵ ئەنجوومەنی وەزیرانی عێراق بکرێت، بەمەبەستی زیادکردنی ئەو بڕەی کە دیاریکراوە و هەمان مامەڵەی پارێزگاکانی دیکەی عێراق لەگەڵ هەرێمی کوردستان بکرێت."

 

زانیاریی زیاتر: سەرەتای مانگی داهاتوو، دروێنەی گەنم لە هەرێمی کوردستان دەست پێدەکات، بۆ وەرگرتنی گەنمی جووتیاران لەسەرجەم پارێزگاکاندا، زیاتر لە 10 سایلۆ و چەند كۆگایەک تەرخاندەکرێت.