خالید شوانی: هەڵەبجە بە فەرمی بووە پارێزگا و مەرسوومی کۆماریی بۆ دەردەچێت

ئاڤا نیوز

 

وەزیری دادی عێراق ڕایگەیاند، ئەمڕۆ یاسای بە پارێزگابوونی هەڵەبجە لە ڕۆژنامەی وەقائیعی عێراقدا بڵاوکرایەوە و بە فەرمی یاساکە کەوتەبواری جێبەجێکردنەوە، بڕیاریشە هەفتەی داهاتوو مەرسوومی کۆماریی بۆ هێنانە کایەی پارێزگای هەڵەبجە دەربکرێت.

 

ئەوەی پێویستە بیزانیت: 14-4-2025 دوای 12 ساڵ لە دواخستنیی بە هۆکاری جۆراوجۆر، پەرلەمانی عێراق دەنگی لەسەر یاسای بەپارێزگابوونی هەڵەبجەدا، 29ی نیسانیش د. لەتیف ڕەشید، سەرۆککۆماری عێراق واژۆی لەسەر یاساکە کرد و ڕەوانەی وەزارەتی دادی کرد بەمەبەستی بڵاوکردنەوەی لە ڕۆژنامەی وەقائیعی عێراقدا.

 

لێدوانی فەرمی: خالید شوانی، وەزیری دادی عێراق ڕایگەیاند، ئەمڕۆ دووشەممە یاسای بە پارێزگابوونی هەڵەبجە لە ڕۆژنامەی وەقائیعدا بڵاوکرایەوە و هەڵەبجە بە فەرمی بووە 19هەمین پارێزگای عێراق، هەر ئەمڕۆش یاساکە ڕەوانەی پەرلەمان و حکومەت دەکەنەوە، تاسا مەرسوومی کۆماریی بۆ هێنانەکایەی پارێزگای هەڵەبجە دەربچێت.

 

- وتیشی، لە ژمارەی هەفتەی داهاتووی ڕۆژنامەی وەقائیعدا مەرسوومی کۆماریی تایبەت بە هێنانەکایەی پارێزگای هەڵەبجە وەک 19هەمین پارێزگای عێراقیش بڵاودەکەنەوە، بەوەش هەموو ڕێکارە یاسایی و کارگێڕییەکانی تایبەت بە هەڵەبجە تەواو دەبن و لەمەدوا ئەرکی وەزارەتە فیدڕاڵییەکان و وەزارەتەکانی حکومەتی هەرێمی کوردستانە ناوەڕۆکی یاساکە جێبەجێ بکەن.

 

- سەبارەت بە بوونی تێبینیش لەسەر کۆبوونەوەی پەرلەمان تایبەت بە پەسەندکردنی یاسای بەپارێزگابوونی هەڵەبجە، وەزیری دادی ئاماژەی بەوەکرد، ئەوانیش لەڕووی یاساییەوە چاودێریی و بەدوادچوون بۆ سکاڵاکان دەکەن، بەدووریشی زانی سکاڵاکان کاریگەرییان لەسەر یاسای بە پارێزگابوونی هەڵەبجە هەبێت.