مەسرور بارزانی: دەبێت هەرێمی کوردستان لە ڕێگای گەشەپێدان بەشدار بێت

ئاڤا نیوز

 

مەسرور بارزانی لەمیانی كۆبوونەوەی لەگەڵ شاندێكی لیژنەی ئابووری، پیشەسازی و بازرگانیی ئەنجوومەنی نوێنەرانی عێراق، جەختیان لە بەشداریپێكردنی هەرێمی كوردستان لە پرۆژەی 'ڕێگەی گەشەپێدان' كردەوە.

 

وێنە گەورەكە: ڕێگەی گەشەپێدان، پرۆژەیەكی ستراتیژیی هاتووچۆی نێودەوڵەتییە، كە لە بەندەری فاو لە باشووری عێراقەوە دەستپێدەكات و بە شارەكانی دیوانییە، نەجەف، كەربەلا، بەغدا و مووسڵدا تێدەپەڕێت، پاشان لە باشووری ڕۆژهەڵاتی پارێزگای شڕناخەوە دەچێتە نێو خاكی توركیا و لەوێشەوە لە بەندەری مێرسینی سەر دەریای ناوەڕاستەوە دەگاتە ئەوروپا، درێژكراوەی ڕێگەی ئاوریشمە كە ڕۆژهەڵات و ڕۆژئاوای گۆی زەوی بەیەكەوە دەبەستێتەوە.

 

چیرۆكی سەرەكی: ئەمڕۆ دوو شەممە، ڕێککەوتی 5-5-2025، سەرۆكوەزیران مەسرور بارزانی، پێشوازی لە شاندێكی ئەنجوومەنی نوێنەرانی عێراق كرد كە لە ئەندامانی لیژنەی ئابووری و پیشەسازی و بازرگانی پێكهاتبوون.

 

چی باسكرا: لە کۆبوونەوەی سەرۆکوەزیران مەسرور بارزانی و پەرلەمانتارانی عێراق، جەخت لە گرنگیی پەرەپێدانی هاوئاهەنگی و هاریکاریی نێوان هەرێمی کوردستان و ئەنجوومەنی نوێنەران و حکومەتی فیدراڵ کرا. بە تایبەتی لە بوارەکانی پشتگیریکردنی ئەو پرۆژەیاسایانەی لە بەرژەوەنديی گشت هاووڵاتییان و پێکهاتەکانی عێراقدان.

 

بابەتە ستراتیژییەكە: گفتوگۆ لەبارەی گرنگیی پڕۆژەى ڕێگەی گەشەپێدان و بەستنەوەی وڵاتانی کەنداو و عێراق و هەرێمی کوردستان بە تورکیا و ئەوروپا لە ڕێگەی هێڵی ئاسنین کرا و جەخت لە بەشداری و سوودمەندبوونی هەرێمی کوردستان و هەموو ناوچە و پێکهاتەکانی عێراق لەو پڕۆژە گرنگەدا کرایەوە. هاوكات جەخت لە پێویستیی ئازادیی ئاڵوگۆڕی بازرگانی و جووڵەی کاڵاکان لەنێوان هەموو ناوچەکانی عێراق كرایەوە لەپێناو نەهێشتنی هەر بەربەست و ئاستەنگێکی بەردەم ئەم بابەتە.

 

لێدوانی فەرمی: سەرۆکوەزیران مەسرور بارزانی دووپاتی کردەوە، "کە پێویستە ڕێز لە سیستمی فیدراڵی و دەستووری عێراق بگیرێت کە ماف و ئەرکەکانی هەر لایەکی دەستنیشان کردووە".

سەرۆکوەزیرانی کوردستان، ئاماژەی بەوەشكرد، "عێراق لەڕووی ماددی و مرۆییەوە، وڵاتێکی دەوڵەمەندە و خاوەن پێگەیەکی جیۆپۆلیتیکی گرنگیشە و تەنیا پێویستی بە حوکمڕانی و بەڕێوەبردنێکی باش و دادپەروەرانە هەیە کە ڕێز لە مافەکانی هەموو ناوچە و گشت پێکهاتەکانی عێراق بگرێت".

 

بۆچی گرنگە: ڕێگەی گەشەپێدان، هاوکار دەبێت لە گەشەی ئابووری و پتەوکردنی پەیوەندییە هەرێمی و نێودەوڵەتییەکان بۆ بەدیهێنان و یەکخستنی ئابووری و هۆکارێکیشە بۆ بەستنەوەی ئابووری ناوچەکە بە ڕۆژهەڵاتی ئاسیا و کیشوەری ئەوروپا.