شەرع بۆ سەردانیکردنی بەغدا داوای پارێزبەندیی ئەمریکا دەکات

ئاڤا نیوز

سەرۆککۆماری سووریا بە فەرمی بانگهێشتی بەغدا کراوە بۆ بەشداریکردن لە لووتکەی وڵاتانی عەرەبی، بەڵام شەرع مەترسیی هەیە بکرێتە ئامانج بۆیە داوای پارێزبەندیی ئەمریکای کردووە.

چیرۆکی سەرەکی: لە 17ـی ئەم مانگە، عێراق میوانداری کۆبوونەوەی لووتکەی عەرەبی لەبەغدا دەکات، وێڕای ناکۆکییە سیاسییەکان لە بەشداریکردنی ئەحمەد شەرع، حکومەتی عێراق بە فەرمی وەک سەرۆککۆماری سووریا بانگهێشتی لووتکەکەی کردووە.

زانیاریی بەدەستهاتوو: سەرەڕای ئەوەی حکومەتی عێراق گەرەنتی داوەتە ئەحمەد شەرع، سەرۆککۆماری سووریا کە پارێزراوە، بەڵام بەگوێرەی میدیا عێراقییەکان، شەرع داوای گەرەنتیی ئەمریکای کردووە بەشێوەیەک کە کۆمپانیایەکی ئاسایشی ئەمریکی پاسەوانیی بکات، چونکە ترسی ئەوەی هەیە بکرێتە ئامانج.

زانیاریی زیاتر: میدیا عێراقییەکان ئاماژە بەوە دەکەن، بێدەنگیی ئێران بەرامبەر بە سەردانەکە ترسی دیمەشقی زیاتر کردووە، ئامادەبوونی شەرع لە لووتکەکە پەیوەستە بە ڕێکارە ئەمنییەکانەوە، بەغدا چەندین گەرەنتی ئەمنیی بە سووریا داوە لەوبارەیەوە، بەڵام حکومەتی سووریا گەرەنتی زیاتری دەوێت.

ئەوەی پێویستە بیزانیت: بانگهێشتکردنی شەرع کاردانەوەی لایەنە سیاسی و گرووپە چەکدارەکانی سەر بە ئێرانی بەدوای خۆیدا هێناوە، چونکە شەرع پێشتر لەلایەن دەسەڵاتی دادوەریی عێراقەوە فەرمانی دەستگیرکردنی هەبووە.