داوای کەمکردنەوەی نرخی کرێی گواستنەوەی سەرنشینانی تاکسیی دەکرێت

ئاڤا نیوز

سەندیکای شۆفێران دوای بڕیارەکەی وەزارەتی ناوخۆ لەبارەی گۆڕینی تاکسییە کۆنەکان بۆ جۆری مۆدێل بەرز و کارەبایی، داوا دەکات نرخی گواستنەوەی سەرنشین بەفەرمی دیاری بکرێت و جیاوازیی هەبێت لەنێوان ئۆتۆمبێلی کارەبایی و بەنزین.

وێنە گەورەکە: وەزارەتی ناوخۆ بڕیاری تازەی بۆ ئۆتۆمبێلی تاكسی لە هەرێمی كوردستان دەرکردووە و لەمەودوا ڕێگە دەدرێت ئەو ئۆتۆمبێلانەی هایبرێد و كارەبایین بكرێن بە تاكسی، بۆ ئاسانکاریی پرۆسەکەش ئۆتۆمبێلە کارەباییەکان لە باجی گومرگی دەبەخشرێن و ڕەقەمیان بەخۆڕایی پێ دەدرێت.

لێدوانی فەرمی: دوای ئەم بڕیارەی وەزارەتی ناوخۆ، ئازاد ئەحمەد، سەرۆکی لقی سلێمانیی سەندیکای شۆفێران بە ئاڤای ڕاگەیاند: پێویستە نرخی گواستنەوەی تاکسیی لە هەرێمی کوردستان کەم بکرێتەوە، بەتایبەت تاکسییە کارەباییەکان، چونکە پێویستییان بە بەنزین نابێت.

- پێشتر بەڕێوەبەرایەتیی گواستنەوە، مانگانە كرێی تاكسیی ناوشاری دیاری دەكرد، بەڵام چەند ساڵێكە ئەمە ناکرێت، بۆیە پێشنیاز دەكەم وەزارەتی ناوخۆ ئەم کارە بکات و نرخی گواستنەوەی تاكسی دیاری بكات.

- دوای ورووژاندنی ئەو بابەتە لەلایەن ئاڤا میدیاوە، بە نووسراوی فەرمی ئەو داوایە ئاراستەی بەڕێوەبەرایەتیی گواستنەوە دەکەم، بەڵکو بگاتە جێگەی مەبەست و جێبەجێ بكرێت.

باکگراوند: لە هەنگاوێکی نوێدا، وەزارەتی ناوخۆ بە ئامانجی نوێکردنەوەی مۆدێلی ئۆتۆمبێلی تاکسی لە سەرتاسەری هەرێمی کوردستان و بەرزکردنەوەی ئاستی پاراستنی ژینگە و باشترکردنی خزمەتگوزاریی بۆ سەرنشینەکان و جێبەجێکردنی ستانداردی تەکنیکی نوێ، دەرگای تۆمارکردنی تاکسی نوێ دەکاتەوە و بەپێی بڕیارەکەش تەنیا ئۆتۆمبێلەکانی مۆدێلی ساڵانی (2023-2024-2025) دەکرێنە تاکسی کوردستان و هەموو جۆرەکانی ئۆتۆمبێلیش لە چوارچێوەی ئەو مۆدێلانە ڕێگەپێدراوە.

ئەوەی پێویستە بیزانیت: گۆڕینی تاکسیی کۆن بۆ نوێ ئارەزوومەندانەیە و وەستاوەتە سەر دۆخی دارایی شوفێرەکە، ئۆتۆمبیلی هایبرێد و تەواو کارەبایی زیاد کراون کە دۆستی ژینگە و دۆستی گیرفانی شوفێری تاکسین.