گەندەڵییەکی "گەورە" لە هاوکارییەکانی عێراق بۆ غەززە و لوبنان ئاشکرا دەبێت

ئاڤا نیوز

گەندەڵییەکی "گەورە" لەو هاوکارییانەی بۆ لێقەوماوانی غەززە و لوبنان لەلایەن حکومەتی عێراقەوە نێردراون کراوە و چەند بەرپرسێک بەهۆیەوە ڕاگیراون، لێكۆڵینەوەکانیش لەوبارەیەوە بەردەوامن.

چیرۆکی سەرەکی: بەمەبەستی هاوکاریکردنی خەڵکی لێقەوماوی غەززە و لوبنان، ساڵی ڕابردوو ئەنجوومەنی وەزیرانی عێراق بڕیاریدا ڕێژەی 1% لە مووچەی فەرمانبەران بەشێوەیەکی ئارەزوومەندانە ببڕێت.

لێدوانی فەرمی: چەند سەرچاوەیەک بە ئاڤا میدیایان ڕاگەیاندووە، سکاڵا لە دادگا تۆمار کراوە سەبارەت بە بوونی گەندەڵییەکی گەورە لەو هاوکارییانەی بۆ غەززە و لوبنان لەلایەن حکومەتی عێراقەوە نێردراون و تەنانەت بەڵگانەمەی فەرمیش هەن ئەو گەندەڵییە دەسەلـمێنن، بۆیەش دادگای لێکۆڵینەوەی کەرخ لە دوو ڕۆژی ڕابردوودا دەستی بە لێکۆڵێنەوە کردووە.

زانیاریی زیاتر: بەگوێرەی سەرچاوەکان، دادگا لێکۆڵێنەوەی لەگەڵ چەندین بەرپرس، بەڕێوەبەرانی گشتی و فەرمانبەران کردووە و هەندێکیان ڕاگیراون، ئەگەری هەیە لەچەند ڕۆژی داهاتوودا فەرمانی دەستگیرکردن بۆ چەند تۆمەتبارێك دەربچێت.

ئەوەی پێویستە بیزانیت: لە چەند ڕۆژی ڕابردوودا، بەڵگەنامەیەک بە ناوی ئەو ماددانەی کە بۆ غەززە و لوبنان نێردراون لە سۆشیاڵ میدیا بڵاوکرایەوە، بەشێک لەو خۆراکانە کە نێردراون بریتی بوون لە؛ برنج، شەکر، نیسک، نۆک، کەچەب، جەنجەفیل، حمس بتحینە، مەعکەرۆنە، پەنیر، حەلاوەی بە فستق، موڕەبا، خوێ.