فایلی خەڵك؛ گەڕەکێکی سلێمانی زیاتر لە 13 ساڵە بێ خزمەتگوزارییە

ئاڤا نیوز

گەڕەکی مەلا داودەی سلێمانی زیاتر لە 13 ساڵە خزمەتگوزارییان پێنەگەیشتووە، دانیشتووانەکەی دەڵێن، "دەیان جار داوامان کردووە، بەڵام هیچ ئەنجامێکی نەبووە و کەس نەهاتووە بە دەممانەوە".

وێنە گەورەکە: دانیشتوانی گەڕەکی مەلا داودە لە شاری سلێمانی هاواریان لێ هەڵساوە دەڵێن، بێ خزمەتگوزاریترین گەڕەکین لە سلێمانیدا. داوا دەکەن ئاڤا دەنگیان بە لایەنی پەیوەندیدار بگەیێنێت.

زانیاریی پەیامنێر: ژیوار عەبدولڕەحمان، پەیامنێری ئاڤا بەدواداچوونی بۆ داواکاری گەڕەکەکە کردووە و دەڵێت، ئەم گەڕەکە زیاتر لە 13 ساڵە بەتەواوی ئاوەدان نەکراوەتەوە و دەستی خزمەتگوزاری پێ نەگەیشتووە. دەشڵێت، شەقامەکانی قیڕ نین، ئاو و ئاوەڕۆشیان نییە.

هاوکات دەشڵێت، ئاوی ماڵان و  چڵکاوەکەی هەر بەناو کۆڵانەکاندا دەڕوات. وای لێهاتووە کە هەندێک لە دانیشتوانەکەی خانووەکانیان هەڕاج بکەن و بار بکەن، دەڵێن، "دەستمان لەوە شتووە خزمەتگوزاریمان پێ بگەیێنن، دەیان جار داوامان کردووە هیچ ئەنجامێکی نەبووەو کەس نەهاتووە بە دەممانەوە".

لەلایەکی دیکەوە: شارەوانیی سلێمانی بە ئاڤای ڕاگەیاند، "تاوەکو ئێستا لایەنی ئیداری شارەکە بودجەی پێویستی بۆ دابین نەکردووین تاوەکو خزمەتگوزاریەکانیان پێ بگەیەنین، دەزانین کە دۆخیان خراپە و چەندین جاریش سەردانیان کردووین، بەڵام لەم کاتەدا ناتوانین خزمەتگوزارییان پێ بگەیێنین".