لە هەولێر گەورەترین پێشانگەی گەشتیاری لەسەر ئاستی ڕۆژهەڵاتی ناوەڕاست بەڕێوەدەچێت

ئاڤا نیوز

 

ئەمڕۆ سێشەممە سەرۆکوەزیران مەسرور بارزانی گەورەترین پێشانگەی گەشتوگوزار لە هەولێر دەکاتەوە، جگە لە دامەزراوە و كۆمپانیا ناوخۆییەكان، دەیان كۆمپانیای نێودەوڵەتیی و بیانی تێیدا بەشدار دەبن.

 

وێنە گەورەکە: كەرتی گەشتیاری لە هەرێمی كوردستان ساڵ بە ساڵ زیاتر پێش دەكەوێت، ئێستا تەنیا وەرزەکانی هاوین و بەهار نا، بەڵکو لە وەرزەكانی پایز و زستانیش هەزاران گەشتیار ڕوو لە شارەكانی هەرێمی كوردستان دەكەن، ئەم پێشانگەیەش دەبێتە هۆكارێك بۆ زیاتر ناساندنی ڕووی پێشكەوتنی گەشتیاری لە هەرێمی كوردستان.

 

ئەوەی پێویستە بیزانیت: مێتێكس 2025 كە بە یەكێك لە گەورەترین پێشانگەكانی گەشتوگوزار هەژمار دەكرێت، ئەمڕۆ سێشەممە ڕێککەوتنی 6ـی 5ـی 2025، لە شاری هەولێر دەكرێتەوە و هاوشان لەگەڵ دامەزراوە جیهانییەكان، كۆمپانیا نێوخۆییەكانیش بەشدارێكی كارا دەبن و ماوەی سێ ڕۆژ بەردەوام دەبێت.

 

لێدوانی فەرمی: ئیبراهیم عەبدولمەجید، گوتەبێژی دەستەی گەشتوگوزار بە ئاڤای ڕاگەیاند: "ئامانجی سەرەکیی بووژاندنەوەی کەرتی گەشتیارییە لە هەرێمی کوردستان، ئەویش بە دروستکردنی پردی پەیوەندی لەنێوان کۆمپانیا گەشتیارییە ناوخۆییەکان و کۆمپانیا نێودەوڵەتییەکان کە لە پێشانگاکە بەشدار دەبن."

 

ئەمەش بزانە: لە پێشانگەکە 20 وڵاتی جیاواز بە 150 کۆمپانیا و دامەزراوەی گەشتیاری لە ئەوروپا، ئاسیا، کەنەدا و ئەفریقیا لە پێشانگەی مێتێكس بەشدار دەبن.