لە سلێمانی کامێرای چاودێری و جی پی ئێس لەنێو پاسی گواستنەوەی قوتابیان دادەنرێت

ئاڤا نیوز

 

بەهۆی ناڕەزایی زۆری دایکان و باوکان بەرامبەر بە شوفێری ئەو پاسانەی هاتووچۆ بە قوتابیان دەکەن، بەڕێوەبەرایەتیی گشتیی پەروەردەی سلێمانی پڕۆژەیەکی بۆ کۆنتڕۆڵکردنی دۆخی نێو پاسەکان لە ڕێگەی کامێرای چاودێرییەوە هەیە.

 

چیرۆکی سەرەکی: بەئامانجی پاراستنی سەلامەتیی قوتابیان و دڵنیابوونەوە لە هاتووچۆكردنیان بۆ ناوەندەكانی خوێندن، پەوەردەی سلێمانی پڕۆژەیەکی پێشکەشی قایمقامیەتی سلێمانی کردووە بۆ ئەوەی لە ڕێگەی کامێراوە چاودێریی ئەو پاسانە بکرێت کە هاتووچۆ بە قوتابیان دەکەن.

 

لێدوانی فەرمی: نەژاد عەبدوڵڵا، بەڕێوەبەری گشتیی پەروەردەی سلێمانی بە ئاڤای گوت، "لە ماوەی ڕابردوو دیاردەی زۆر نەشیاو و ناپەروەردەیی لەنێو پاسەکان ڕوویداوە کە بووەتە هۆی بێزاری دایک و باوکان، ئێمەش داواکارییەکمان پێشکەشی لیژنەکانی قایمقامییەت کردووە، بۆ ئەوەی هەم کامێرای چاودێری، هەم جی پی ئێس بۆ پاسەکان دابنرێت."

 

ئەمەش بزانە: لیژنەکانی قایمقامییەت بەهەماهەنگی ئەو کۆمپانیایەی خاوەنی پاسەکانن پرۆسەکە جێبەجێ دەکرێت و بڕیار لە میکانیزمی جێبەجێکردنی دەدەن، کە بە چ شێوازێک چاودێریی دۆخی نێو پاسەکان بکرێت.