سەرۆکایەتی پەرلەمانی عێراق پەرلەمانتارانی ئامادەنەبوو لە دانیشتنەکان سزا دەدات

ئاڤا نیوز

دوای ئەنجامنەدانی دوو دانیشتنی پەرلەمان بەهۆی نیسابەوە، جێگری یەکەمی سەرۆکی پەرلەمانی عێراق بڕیاریدا ناوی  پەرلەمانتارانی ئامادەنەبوو بڵاوبکرێتەوە و سزای دارایی بدرێن.

ئەوەی پێویستە بیزانیت: سەرەتای ئەمساڵ سەرۆکی پەرلەمانی عێراق بڕیاریدا لەمەودوا هەر پەرلەمانتارێک ئامادەی دانیشتنەکانی پەرلەمان نەبێت بە بڕی ملیۆنێک دینار بۆ هەر دانیشتنێک سزادەدرێت، هاوکات بڕیاریشدا سەرجەم خەرجی ناردنەدەرەوە و شاندکردنی پەرلەمانتاران بۆ دەرەوە هەڵبوەشێنێتەوە.

ڕاگەیێنراوی فەرمی: فەرمانگەی ڕاگەیاندنی پەرلەمانی عێراق بڵاویکردەوە، موحسین مەندەلاوی، جێگری یەکەمی سەرۆکی پەرلەمانی عێراق داوای لە هەردوو فەرمانگەی ڕاگەیاندن و کاروباری پەرلەمان کرد، ناوی ئەو پەرلەمانتارانە بڵاوبکەنەوە کە ئامادەی دانیشتنەکەی ئەمڕۆ نەبوون و بەگوێرەی ئەو بڕەشی بڕیاری لێدراوە، سزای داراییان بەسەردا بسەپێنرێت.

ئەمەش بزانە: لەسەر بڕیارەکەی مەندەلاوی، فەرمانگەی ڕاگەیاندنی پەرلەمانی عێراق ناوی پەرلەمانتارانی ئامادەبووی دانیشتنەکەی ئەمڕۆی بڵاوکردەوە کە ژمارەیان 139 پەرلەمانتار بووە.

زانیاریی زیاتر: بۆ دانیشتنی ئاسایی پەرلەمان پێویستە لانیکەم 166 پەرلەمانتار ئامادەبن، بەڵام لە دانیشتنی ئەمڕۆی پەرلەماندا 139 پەرلەمانتار ئامادەبوون، بەوەش نیساب بۆ کۆبوونەوە نەبوو، دانیشتنەکە حەوت بڕگەی لە خۆگرتبوو و یەکێک لە بڕگەکانیش دەنگدان بوو لەسەر پڕۆژەیاسای قەدەغەکردنی فرۆشتنی جگەرە و هاوشێوەکانی بە کەسانی خوار 18 ساڵ.