فایلی خەڵک؛ دوای ڕاپۆرتێکی ئاڤا پارکێکی هەولێر لە زبڵ و خاشاک پاک دەکرێتەوە

ئاڤا نیوز

دوای بەدواداچوونێکی ئاڤا میدیا، پارکێکی قەرەباڵغ لە هەولێر پاک دەکرێتەوە و تەواوی ئەو سەرپێچییانەش هەڵدەگیرێن کە لە نزیک پارکەکەوە هەبوون.

چیرۆکی سەرەکی: پارکی بازاڕی لەنگەی شاری هەولێر یەکێک لە قەرەباڵغترین پارکەکانی هەولێرە. ڕۆژانە دەیان دوکانداری بازاڕەکە و خەڵکی دیکە بۆ پشوودان ڕووی تێدەکەن، پارکەکە بەدەست کەمیی خزمەتگوزارییەوە دەیناڵد، هەروەها لەنێو پارکەکە زبڵ و خاشاکی زۆر هەبوو، ئاڤا میدیا گرفتەکەی گەیاندە لایەنی پەیوەندیدار.

زانیاریی تایبەت: دوای ئەوەی ئاڤا میدیا لە گەشتی کاتژمێر حەوتی هەوراز گوڵپی، باسی نەبوونی خزمەتگوزاری لە پارکەکە کرد، وێنە و ڤیدیۆکانی پارکەکەی ڕادەستی کارزان عەبدولهادی، سەرۆکی شارەوانی هەولێر کرد، ڕاستەوخۆ دەست بە پاککردنەوەی پارکەکە کرا.

لێدوانی فەرمی: ئەندازیار ڕێبین ئەحمەد، بەرێوەبەری ئەندازەی پارکەکانی هەولێر بە ئاڤا میدیا گوت: ئەمڕۆ بەیانی نزیکەی 10 ژینگەپارێز پارکەکەیان لە زبڵ و خاشاک پاککردووەتەوە، جگە لەوەش تەواوی باخچە و دارەکانی نێو پارکەکە ڕێکخراونەتەوە.

- جگە لە پاککردنەوەی پارکەکە، ئەو کەلوپەل و شتانەی لە پشت دیواری پارکەکەوە بەشێوەی سەرپێچی دانرابوون، تیمەکان لایان بردوون.