هەولێر و بەغدا ڕێککەوتنێکی نوێ دەکەن

ئاڤا نیوز

هەولێر و بەغدا ڕێککەوتنێکی نوێ دەکەن، دوای دوو ساڵ کێشە و گرفت و ڕێگری، ڕێککەوتوون دەست بە هەناردەکردنی کاڵا و بەرهەم بکرێتەوە لە کوردستانەوە بۆ عێراق.

چیرۆکی سەرەکی: دوو ساڵە سەرەڕای دەیان گفتوگۆ و دانوستاندن بە بیانووی نەبوونی مۆڵەت و سێڵی گومرگیی لە دەروازەکانی عێراق، ڕێگە نادەن بارهەڵگری کۆمپانیاکانی کوردستان لە دەروازە سنوورییەکانی عێراق تێپەڕن، مانگێکیشە هەناردەکردنی کاڵا و بەرهەم لە کوردستانەوە بۆ عێراق ڕاگیراوە، لە 15ی مانگی ڕابردووەوە یەک بارهەڵگ ئاودیوی عێراق نەبووە. ئەمەش زیانی زۆری لە بازرگانەکانی کوردستان داوە، چونکە ئەو بەرهەمە جۆراوجۆرانەی لە کۆمپانیا و کارگەکانی هەرێمی کوردستان بەرهەم دەهێنرێن، 70%ـی بەرهەمەکان هەناردەی بازاڕەکانی ناوەڕاست و خوارووی عێراق دەکرێن.

ئەوەی پێویستە بیزانیت: ئەمڕۆ لە بەغدا شاندی ژوورە بازرگانییەکانی هەرێمی کوردستان و یەکێتی ژوورە بازرگانییەکانی عێراق کۆبوونەتەوە بۆ ئەوەی ئەم پرسە چارەسەر بکەن.

زانیاریی بەدەستهاتوو: ئاڤا زانیویەتی ڕێککەوتنێکی سەرەتایی کراوە، بۆئەوەی دەست بە هەناردەی کاڵاکان بکرێتەوە، لەماوەی ڕۆژانی داهاتووش بۆ بەشی دووەمی ڕێککەوتنەکە لە هەولێر کۆدەبنەوە. هاوکات ئەو کاڵایانەی لە 15ی چوار بەدواوە لە هەرێمی کوردستان ماونەتەوە، دەکرێ هەناردەی پارێزگاکانی عێراق بکرێن، تاوەکو 10ـی ئەم مانگە دەرفەتیان هەیە.

لێدوانی فەرمی: شوکری جەمیل، سەرۆکی ژووری بازرگانی و پیشەسازیی دهۆک بە ئاڤای گوت، لە ماوەی 10 ڕۆژی داهاتوو شاندی بەغدا دێنە هەولێر و میکانزمی جێبەجێکردنی بەشی دووەمی ڕێککەوتنەکە دیاریدەکەن.

- هەر بارهەڵگرێک کە داخل دەبێت، کەشفی بۆ دەکرێت و گومرگی لێوەردەگیرێت، مەنەفێست و پێناسی گومرگی دەکرێت، ئینجا مۆر دەکرێت و بارەکە قوفڵ دەکرێت، ڕاستەوخۆ بەرەو ئەو شارە دەکرێت کە بارەکەی بۆ هاتووە.

سیڵە چییە؟ هەر بارێک کە دەنێردرێ بۆ نموونە بۆ بەسرە، نابێت لەهیچ شوێنێک بکرێتەوە تا دەگاتە شوێنی مەبەست لە بەسرە.