گرفتی نەخوێندنەوەی پەنجەمۆر لەکاتی دەنگدان چارەسەر دەکرێت

ئاڤا نیوز

کۆمیسیۆنی باڵای هەڵبژاردنەکانی عێراق بە گرێبەستکردن لەگەڵ کۆمپانیایەکی کۆری، کێشەی ئەو کەسانە چارەسەر دەکات کە کێشەی نەخوێندنەوەی پەنجەمۆریان هەیە لە کاتی دەنگدان دا.

بۆچی گرنگە: لە هەڵبژاردنەکانی ڕابردوودا چ لە هەرێمی کوردستان و چ لە عێراق بە گشتی، بەدەیان هەزار کەس بەهۆی نەخوێندنەوەی پەنجەمۆر نەیانتوانیوە دەنگ بدەن و لەو مافە بێبەشکراون.

چیرۆکی سەرەکی: سێشەممە 6-5-2025، ئەنجوومەنی وەزیرانی عێراق هەژدەهەمین دانیشتنی ئاسایی خۆی بە سەرۆکایەتی محەممەد شیاع سوودانی، سەرۆکوەزیرانی عێراق ئەنجامدا.

ڕاگەیێنراوی فەرمی: بەگوێرەی ڕاگەیێنراوی نووسینگەی سەرۆکوەزیرانی عێراق لە کۆبوونەوەکە، سەرۆکوەزیران کۆمیسیۆنی باڵای سەربەخۆی هەڵبژاردنی ڕاسپارد بۆ واژۆکردنی گرێبەست لەگەڵ کۆمپانیای (میرۆ)ی کۆریای باشوور بۆ دابینکردنی کامێرای بایۆمەتری بۆ چارەسەرکردنی حاڵەتەکانی ئەوانەی کێشەی نەخوێندنەوەی پەنجەمۆریان هەیە لە ڕۆژی دەنگداندا.

لەلایەکی دیکەوە: پێشتر جومانە غەلای، گوتەبێژی کۆمسیۆنی باڵای سەربەخۆی هەڵبژاردنەکانی عێراق ڕایگەیاندبوو: بۆ نوێکردنەوەی داتای ئەو دەنگدەرانەی کە پەنجەمۆریان ناخوێندرێتەوە، کۆمسیۆن لە ڕۆژی دەنگدان پشت بە وێنەی چاویان دەبەستێت.

ئەوەی پێویستە بیزانیت: بڕیارە لە 11-11-2025، هەڵبژاردنی خولی شەشەمی پەرلەمانی عێراق بەڕێوەبچێت، ئامادەکارییەکان لەلایەن کۆمیسیۆنەوە بەردەوامە.