ترەمپ بۆ مارک کارنی: یەکگرتنی کەنەدا و ئەمریکا هاوسەرگیریەکی ناوازە دەبێت

ئاڤا نیوز

سەرۆکی ئەمریکا ویستی خۆی بۆ یەکگرتنی ئەمریکا و کەنەدا دووپات دەکاتەوە و بە هاوسەرگیرییەکی ناوازەی ناوزەند دەکات.

وێنە گەورەکە: دۆناڵد ترەمپ، سەرۆکی ئەمریکا لەسەرەتای دەستبەکاربوونی لە خولی دووەمی سەرۆکایەتی ئەمریکا بانگەشەی زیادکردنی کەنەدای وەک ویلایەتی 51مینی ئەمریکا دەست پێکرد، سەرەڕای تێکچوونی پەیوەندییەکانی نێوانیان و لێدوانی دژبەیەک بە هۆی بانگەشەکەی ترەمپەوە ئەمڕۆ لە کۆشکی سپی و لە کاتی پێشوازی لە مارک کارنی، سەرۆکوەزیرانی کەنەدا بۆ جارێکی دیکە ویستی واشنتنی بۆ یەکگرتنی کەنەدا و ئەمریکا دووپاتکردەوە.

لێدوانی فەرمی: دۆناڵد ترەمپ، لە هۆڵی ئۆڤڵ بە مارک کارنی گوت: یەکگرتنی کەنەدا و ئەمریکا لە بەرژەوەندی کەنەدییەکان دەبێت، باجی کەمتر، سوپای خۆڕایی، هەرچەندە هەر ئێمەین دەتانپارێزین کاتێک کێشەیەکتان هەبێت، بەڵام یەکگرتنی کەنەدا و ئەمریکا هاوسەرگیرییەکی زۆر ناوازە و جوان دەبێت، چونکە پەیوەندییەکی زۆر باشیان هەیە و یەکتریان زۆر خۆش دەوێت.

لە لایەکی دیکەوە: مارک کارنی، سەرۆکوەزیرانی کەنەدا وەڵامی دۆناڵد ترەمپ، سەرۆکی ئەمریکای دایەوە و گوتی: کەنەدا بۆ فرۆشتن نییە، هەروەک چۆن ئەم شوێنەی لێی دانیشتووین (کۆشکی سپی) بۆ فرۆشتن نییە، بە هەمان شێوە هەرگیز کەنەدا نابێت بە شوێنێک بۆ فرۆشتن.

ئەوەی پێویستە بیزانیت: کۆبوونەوەی ئەمڕۆی دۆناڵد ترەمپ و مارک کارنی، یەکەم کۆبوونەوەی نێوانیانە و پرسی جەنگی بازرگانی و ڕێککەوتنی نوێی ئابووری ئامانجی سەرەکی سەردانەکەی سەرۆکوەزیرانی کەنەدایە.