لەسەر تۆمارێکی دەنگی خەمیس خەنجەر بانگهێشتی دادگا دەکرێت

ئاڤا نیوز

لەسەر بڵاوبوونەوەی تۆمارێکی دەنگی، دادگای لێکۆڵینەوەی کەرخ بانگهێشتی سەرۆکی هاوپەیمانیی سیادە دەکات.

چیرۆکی سەرەکی: مانگی ڕابردوو لە یەکێک لە کەناڵە عێراقییەکان، تۆمارێکی دەنگیی دزەپێکراو بڵاوکرایەوە، ئەو کات گووترا تۆمارەکە دەنگی خەمیس خەنجەر، سەرۆکی هاوپەیمانیی سیادە و سەرۆکی پێشووی حیزبی سیادەیە، خەنجەر لە تۆمارە دەنگییەکەدا دەڵێت، لە ساڵی 2003ـەوە میلیشیاکان حوکمی عێراق دەکەن.

زانیاریی بەدەستهاتوو: سەرچاوەیەکی ئاگادار، بە ئاڤای ڕاگەیاند: دادگای لێکۆڵینەوەی کەرخ بڕیاری داوە خەمیس خەنجەر، سەرۆکی هاوپەیمانیی سیادە، لەسەر قسەکانی ناو تۆمارە دەنگییەکە بانگهێشت بکات و لێکۆڵینەوەی لەگەڵدا دەکرێت.

ئەوەی پێویستە بیزانیت: کۆتایی مانگی ڕابردوو دادگای سێیەمی لێکۆڵینەوەی کەرخ، دەستپێکردنی ڕێککارەکانی لێکۆڵینەوەی سەبارەت بەو تۆمارە دەنگییە دەستپێکرد.

ئەوەی لەوبارەیەوە دەگوترێت: تۆمارە دەنگییەکە دەڵێت: لە ساڵی 2003ـەوە میلیشیا حوکمی عێراق دەکەن و دەستیان بەسەر جومگەکانی حکومڕانی گرتووە لەلایەنی ئاسایش، ئابووری، دادگا و تەنانەت خوێندنیش.. ئێمەش پشتگوێخراوین، ئەو دابەشکاریی دەسەڵاتە کە ناویان ناوە "سازان" لەڕاستیدا هۆکاری خراپەیە. دەشڵێت؛ ئێمەی سوننە پێویستمان بە دەسەڵات نییە، بەڵکو هاوسەنگی، حوکمڕانی دەبێت لەدەستی ئێمە بێت و بڕیار سیاسی بەسەر پێکهاتەکان دابەش بکرێتەوە، ئەگەر گۆڕانکاریی نەکرێت لەداهاتوودا ڕووخانی زیاتر دەبینین.

کاریگەریی و لێکەوتەکان: داواکاری گشتیی داوایەکی لە پەرلەمانتاران محەمەد جاسم خەفاجی و  ئەمیر ڕەزاق ئەجلان پێگەیشت بۆ گرتنەبەری ڕێکاری یاسایی سەبارەت بەو بابەتە.

بۆچوونی لایەنی بەرامبەر: حیزبی سیادە، کە خەمیس خەنجەر ئەمینداری پێشووی بوو لە ڕاگەیێنراوێکدا ئەو تۆمار دەنگییە ڕەتدەکاتەوە.