عێراق: یەکخستنی سزای هاتووچۆ لە نێوان بەغدا و هەرێمی کوردستان نزیکە لە تەواوبوون

ئاڤا نیوز

وەزارەتی ناوخۆی عێراق ڕایدەگەیێنێت، لیژنەی یەکخستنی سزای هاتووچۆ لە نێوان حکومەتی فیدراڵ و حکومەتی هەرێمی کوردستان بەمزووانە کارەکانی تەواو دەکات، ئەمەش وەک هەنگاوێک بە ئامانجی یەکخستنی ڕێکارەکانی هاتووچۆ لەسەر ئاستی وڵات.

بۆچی گرنگە: یەکخستنی سەپاندنی سزاکانی هاتووچۆ لەنێوان هەرێمی کوردستان و شارەکانی دیکەی عێراق، کاریگەری لەسەر کەمبوونەوەی ئەو سەرپێچییانە دەبێت کە لەلایەن ئەو ئۆتۆمبێلانەی هەڵگری تابلۆی شارەکانی دیکەی عێراقن، بە پێچەوانەشەوە.

لێدوانی ڕۆژنامەوانی: عەمید مقداد میری، بەڕێوەبەری بەشی پەیوەندی و ڕاگەیاندن لە وەزارەتی ناوخۆ لە کۆنفرانسێکی ڕۆژنامەوانیدا ڕایگەیاند: لیژنەیەکی تایبەت پێکهێنراوە بۆ یەکخستنی سزای هاتووچۆ لەنێوان بەغدا و هەرێمی کوردستان، گفتوگۆ لەگەڵ بەرپرسانی هەرێمی کوردستان کراوە و بڕیارە لە زووترین کاتدا کارەکانی تەواو بکات.

هەنگاوی داهاتوو: لەهەمان کاتدا هەنگاوی داهاتوو دانانی سیستەمێکی یەکگرتووی سزاکانی هاتووچۆ دەبێت، بۆ ئەوەی ناوەندی بێت و لە هەموو بەشەکانی عێراق جێبەجێ بکرێت، لەنێویشیاندا پارێزگاکانی هەرێمی کوردستان.

ئەوەی پێویستە بیزانیت: لە سەرەتای ئەمساڵدا شاندێک لە بەڕێوەبەرایەتیی گشتیی هاتووچۆی عێراق سەردانی شاری هەولێری کردبوو، لە چوارچێوەی زنجیرەیەک کۆبوونەوە کە لە ساڵی 2023ـەوە دەستی پێکردووە، بە ئامانجی یەکخستنی سیاسەتەکانی هاتووچۆ لە نێوان هەردوولا.