فایلی خەڵک؛ ئاڤا بەدواداچوون بۆ کێشەی زەویی کەسوکاری شەهیدانی شەڕی داعش لە سلێمانی دەکات

ئاڤا نیوز

هەزار و 250 کەسوکاری شەهیدانی شەڕی داعش حەوت ساڵ لەمەوبەر یەکی پارچە زەوییەکیان پێبەخشرا، بەڵام نە دەتوانن خانووی لەسەر دروست بکەن، نە دەشتوانن مامەڵەی پێوە بکەن.

وێنە گەورەکە: ساڵی 2018 شێخ جەعفەر کە ئەوکات فەرماندەی فەرماندەیی هێزەکانی یەکەی حەفتای پێشمەرگە بوو، بڕیاریدا زەوی بەسەر کەسوکاری شەهیدانی شەڕی داعش دابەش بکات، بەڵام سەرباری ئەوەی ناتوانن سوود لە پارچە زەوییەکانیان وەرگرن، تەنانەت لەلایەن لایەنە پەیوەندیدارەکان (وەزارەتی شەهیدان و شارەوانیی سلێمانی) هیچ ڕوونکردنەوەیەکیان پێنادرێت.

لێدوانی تایبەت: محەممەد مەحموود باوکی شەهیدە دەڵێت: ئەوە شەش ساڵە دەستی دەستیمان پێ دەکەن، کەس وەڵاممان ناداتەوە، کاتێکیش دەمانەوێت مامەڵە بەو زەوییانەوە بکەین یەکسەر ئاسایش دێتە سەرمان و دەڵێن، واز لەو زەوییانە بێنن ئەوانە هێڵی سوورن بۆتان نییە دەستکارییان بکەن.

لەلایەکی دیکە: شنۆ کەمال کە 10 ساڵە هاوژینەکەی شەهید بووە، هێندە دەستی دەستی پێکراوە، بێزار بووە و وازی لە زەوییەکە هێناوە.

زانیاریی پەیامنێر: ژیوار عەبدولڕەحمان، پەیامنێری ئاڤا بەدواداچوونی لە پارێزگا و بەڕێوەبەرایەتیی شارەوانیی سلێمانی، بەڕێوبەرایەتیی شەهیدان و ئەنفالکراوان کردووە، هەموویان پشتڕاستیان کردووەتەوە، هیچ فەرمانێکی دابەشکردنی زەوییان پێنەگەیشتووە و دەڵێن: ئاگادارین زەوییان پێدراوە، بەڵام بەفەرمی ئاگادار نەکراوینەتەوە.

ئەوەی پێویستە بیزانیت: زەوییەکان دەکەونە نزیک خەلیفاوا و کەنەسوورە، کەسوکاری شەهیدانی شەڕی داعش، لەڕێگەی ئاڤا میدیاوە داوا لە شێخ جەعفەر، جێگری سەرۆکی هەرێمی کوردستان دەکەن خەمێکیان لێ بخواتەوە.