سوودانی بۆ سێیەمجار لەدوای دەستبەکاربوونی سەردانی تورکیا دەکات

ئاڤا نیوز

بۆ سێیەمجار لەدوای دەستبەکاربوونی لە پۆستی سەرۆکوەزیرانی عێراق، بڕیارە ئەمڕۆ پێنجشەممە محەممەد شیاع سوودانی سەردانی تورکیا بکات و لە بوارەکانی ڕێگای گەشەپێدان، وزە، گواستنەوە و ئاڵوگۆڕی بازرگانیدا ژمارەیەک یاداشتی لێکتێگەیشتن لەنێوان هەردوو وڵاتدا واژۆ دەکرێن.

وێنە گەورەکە: محەممەد شیاع سوودانی، سەرۆکوەزیرانی عێراق ئازاری ساڵی 2023 و تشرینی دووەمی ساڵی 2024 دووجار سەردانی تورکیای کردووە، لە بەرامبەریشدا 22ـی نیسانی 2024 و بۆ یەکەمجار دوای 13 ساڵ، ڕەجەب تەیب ئەردۆغان، سەرۆککۆماری تورکیا سەردانی عێراق و هەرێمی کوردستانی کرد، لەو سەردانەدا 26 یاداشتنامەی لێکتێگەیشتن واژۆ کرا. کە چواریان لە بواری سەربازی و ئەمنیدا بوون.

چیرۆکی سەرەکی: ئەمڕۆ پێنجشەممە 8ـی ئایاری 2025  لەسەر بانگهێشتی سەرۆککۆماری تورکیا و بە ئامانجی بەشداریکردن لە کۆبوونەوەی ئەنجوومەنی باڵای هاریکاری ستراتیژیی نێوان بەغدا و ئەنقەرە، سەرۆکوەزیرانی عێراق سەردانی ئەنقەرە دەکات.

بەشێک لە دیارترین ئامانجەکانی سەردانەکە و ئەو یاداشتانەی بڕیارە واژۆ بکرێن:

٠ هەنگاوە کۆتاییەکانی پڕۆژەی ڕێگای گەشەپێدان 

٠ هێڵی بەستنەوەی کارەبا و زیادکردنی پشکی ئاوی عێراق بەر لە هاتنی وەرزی هاوین

٠ هەماهەنگی ئەمنیی و هەوڵی هاوبەش بۆ ڕووبەڕووبوونەوەی تیرۆر

٠ برەودان بە پەیوەندییە ئابوورییەکان و ئاڵوگۆڕی بازرگانی هاوبەش کە ئێستا 20 ملیارە بۆ 30 ملیار دۆلار

٠ بەشدارییەکی کاراتری کۆمپانیاکانی تورکیا لە کەرتی ئاوەدانکردنەوەی عێراق و بونیادنانی شاری گەورە و پێشکەوتوو

٠ زیادکردنی هەماهەنگی هاوبەش بۆ پاراستنی ئاسایشی سنوورەکان