وەزارەتی پەروەردە: هەموو ڕێوشوێنێك بۆ ڕێگریكردن لە گزیی تاقیكردنەوەكانی پۆلی 12 گیراونەتە بەر

ئاڤا نیوز

كەمتر لە مانگێك ماوە بۆ بەڕێوەچوونی تاقیكردنەوەی كۆتایی قوتابییانی پۆلی 12ـی ئامادەیی و وەزارەتی پەروەردە سەرقاڵی ئامادەكارییەكانە بۆ بەڕێوەچوونی پرۆسەكە.

وێنە گەورەکە: ئەمساڵ 115 هەزار و 862 قوتابیی پۆلی 12 بە قوتابیانی دەرەكی و پیشەییەكانیشەوە مافی بەشدارییان لە تاقیكردنەوەكان هەیە بەڵام ڕەنگە بە هۆی بەشدارینەكردنی بەشێك لە قوتابیان ژمارەكە كەم بێتەوە.

لێدوانی فەرمی: د. سەیوان عەلی، سەرۆكی لیژنەی باڵای ئەزموونەكان بە ئاڤا میدیای ڕاگەیاند:

٠ ڕۆژی 1ـی 6، تاقیكردنەوەی كۆتایی پۆلی 12ـی ئامادەیی لە هەرێمی كوردستان بەڕێوەدەچێت، ساڵانە لە مانگی 10 تاوەكوو كۆتایی مانگی پێنج ئامادەكاریی دەكەین بۆ بەڕێوەچوونی تاقیكردنەوەكان و ئێستا ئامادەكاریی تەواو بۆ بەڕێوەچوونی تاقیكردنەوەكانی پۆلی 12 كراوە.

٠ ئامادەكارییەكان بە هەماهەنگی وەزارەتەکانی ناوخۆ، تەندروستی، گەیاندن ، خوێندنی باڵا و كارەبا دەكرێن، ئەمەش ساڵانە تاوەكوو كۆتایی تاقیكردنەوەكان بەردەوام دەبێت.

٠ هەر قوتابییەك گرفتێك یان پرسیارێكی سەبارەت بە ناو و شوێنی تاقیكردنەوەكانی هەبێت دەتوانێت پەیوەندی بە لیژنەی باڵای ئەزموونەكانەوە بكات.

٠ هەموو ڕێوشوێنێك گیراوەتەبەر بۆ ئەوەی بە هیچ شێوەیەك لە تاقیكردنەوەكان گزی نەكرێت ئەوەی كە ساڵانە باس دەكرێت سەبارەت بە دزەكردنی پرسیاری تاقیكردنەوەكان ڕاست نییە.

لەلایەكی دیكەوە: وەزارەتی پەروەردە لینكێكی بڵاوكردەوە ئاگادارییەكی ئاراستەی سەرجەم قوتابیانی پۆلی 12 كرد و ڕوونی كردەوە كە دەتوانن لەو ڕێگەیەوە، بەپێى پارێزگاکان شوێن و هۆڵى تاقیکردنەوەی وزاری بزانن، هەروەها ڕۆژێک پێش  ئەنجامدانى یەکەم تاقیکردنەوە کە لە ڕێکەوتى 2025-06-01، کاتژمێر 7:30ـی بەیانی ئەنجام دەدرێت، پێویستە قوتابیان سەردانى هۆڵەکانیان بکەن بۆ دڵنیابوون لە شوێن و ناوەکانیان بۆ ئەنجامدانى تاقیکردنەوەکان.