سەرچاوەیەکی ئەمنی: هیچ کاروانێكی سەربازیی ئەمریکا لە سووریاوە بەرەو عێراق نەکشاوەتەوە

ئاڤا نیوز

سەرچاوەیەکی ئەمنی دەنگۆی هاتنی کاروانێکی سەربازیی ئەمریکی لە سووریاوە بۆ نێو خاکی عێراق ڕەتدەکاتەوە.

وێنە گەورەکە: لە دوای ڕووخانی دەسەڵاتی بەشار ئەسەد لە سووریا و پێکهێنانی حکومەتی نوێ لەو وڵاتە، ئەمریکا کە سەرۆکایەتیی هاوپەیمانیی نێودەوڵەتی بۆ بەرەنگاربوونەوەی داعش لە عێراق و سووریا دەکات، بڕیاریداوە هێزەکانی لە سووریا و ڕۆژئاوای کوردستان کەم بکاتەوە، لە ماوەی دوو هەفتەدا دوو کاروانی سەربازیی لەو وڵاتە کشاندووەتەوە.

زانیاریی بەدەستهاتوو: بەگوێرەی سەرچاوەیەکی ئەمنی عێراق، هێزەکانی ئەمریکا تەنیا لە نێو سنووری سووریا بەرەو دەروازەی وەلید و ناوچەی تەنف جموجۆڵیان پێکراوە و هیچ کاروانێکی سەربازیی ئەمریکا لەهیچ دەروازەیەکی سنووری لە سووریاوە بەرەو عێراق نەکشاوەتەوە.

باکگراوند: پێشتر میدیاکانی عێراق بڵاویانکردووەتەوە، کاروانێکی سەربازیی نوێی هێزەکانی "هاوپەیمانی نێودەوڵەتی" کە لە دەیان بارهەڵگری گەورە بە کەلوپەل و کەرەستەی قورسی سەربازی پێکهاتووە لە چەند بنکەیەک لەوانەش بنکەکانی ئەلعومەر و کۆنیکۆ لە ڕۆژهەڵات و باکووری شاری دێرەزۆر بەرەو عێراق کشانەوە.

ئەمەش بزانە: لە 19-4-2025،  وەزارەتی بەرگریی ئەمریکا (پێنتاگۆن) ڕایگەیاند، لە شکستپهێنانی داعش سەرکەوتوو بوون و بە فەرمانی وەزیری بەرگری ئەمریکا لە چەند مانگی داهاتوودا ژمارەی هێزەکانیان لە سووریا لە کۆی دوو هەزار و 500 سەربازەوە بۆ هەزار سەرباز کەمدەکاتەوە.