پووتین: سەرکەوتنی ڕووسیا بەسەر نازییەکان ئاشتی بۆ جیهان هێنا

ئاڤا نیوز

سەرۆکی ڕووسیا لە یادی 80 ساڵەی ڕۆژی سەرکەوتنی ڕووسیا لە پێشوازی سەرۆکەکانی جیهان چەند پەیامێکی جیاوازی ڕاگەیاند و تێیدا ئاماژەی بەوە کرد کە ئەم سەرکەوتنە ئاشتی بۆ جیهان هێنا و کۆتایی بە هیتلەر و جەنگی دووەمی جیهانی هێنا.

وێنە گەورەکە: وەک نەریتێکی ساڵانە 9ـی5ـی هەموو ساڵێک ڕووسیا یادی سەرکەوتنی سوپای سوری سۆڤیەت بەسەر سوپای نازیدا دەکاتەوە و ئەم ڕۆژە بە ڕۆژی سەرکەوتن ناسراوە، ئەمڕۆ لە سەرانسەری ڕووسیا یادی ڕۆژی سەرکەوتن دەکرێتەوە و لە ڕێوڕەسمێکی تایبەتدا بە ئامادەبوونی ژمارەیەکی زۆر لە سەرۆکەکانی جیهان و نوێنەری وڵاتان لە مۆسکۆ یادی 80 ساڵەی سەرکەوتنی ڕووسیا بەڕێوەدەچێت.

لێدوانی فەرمی: ڤلادیمێر پووتین، سەرۆکی ڕووسیا لە وتارێکدا لە پێشوازی سەرۆکەکانی بەشداربوو لە ڕێوڕەسمەکە گوتی: ئێوە هاتوون بۆ مۆسکۆ  بۆ یادی سەرکەوتن بەسەر نازییەکاندا، بۆ ڕێزگرتن لە گیانی ئەو سەربازانەی ئەم سەرکەوتنەیان لە پێناو خاک و زمان و نیشتمان تۆمار کرد، ڕووسەکان سەرکەوتنیان بەدەستهێنا و کۆتاییان بە هیتلەر و نازییەکان هێنا. هاوکات ئەم سەرکەوتنە بووە هۆی ئاشتی بۆ جیهان و کۆتاییهێنان بە جەنگی دووەمی جیهانی.

باکگراوند: لە 9ـی 5ـی 1945 سوپای سوری یەکێتی سۆڤیەت ناسراو بە " کراسنی ئارمی красная армия  " سەرکەوتنی بەسەر سوپای نازی ئەڵمانیدا ڕاگەیاند و کۆتایی جەنگی دووەمی جیهانی ڕاگەیەنرا.