هاوپەیمانی سیادە: پێشوازی لە دەرئەنجامەکانی لووتکەی ئەنقەرە دەکەین

ئاڤا نیوز

سەرۆکی هاوپەیمانی سیادە، پێشوازی لە دەرئەنجامەکانی لووتکەی ئەنقەرە لەنێوان سەرۆک وەزیرانی عێراق و سەرۆککۆماری تورکیا دەکات و بە هەنگاوێکی مێژوویی لە ڕێڕەوی پەیوەندییەکانی نێوان هەردوو وڵات ناوی دەبات.

 

چیرۆکی سەرەکی: ڕۆژی پێنجشەممە 8-5-2025,  محەممەد شیاع سوودانی، سەرۆکوەزیرانی عێراق بە یاوەری شاندێکی باڵا گەیشتە ئەنقەرە و لەگەڵ ڕەجەب تەیب ئەردۆغان، سەرۆککۆماری تورکیا ڕێککەوتننامەیەکی 11 خاڵییان لە بوارەکانی سەربازی و ڕووبەڕووبوونەوەی تیرۆر، گۆڕانکارییەکانی کەشوهەوا و بەرەنگاربوونەوە و ڕێگریکردن لە بازرگانی ماددەی هۆشبەر واژۆکرد.

 

ڕاگەیێنراوی فەرمی: خەمیس خەنجەر، سەرۆکی هاوپەیمانی سیادە لە بارەی سەردانەکەی سوودانی بۆ ئەنقەرەو دەرئەنجامی کۆبوونەوەکانی ڕایگەیاند:

- پێشوازی لە دەرەنجامەکانی لووتکەی ئەنقەرە لەنێوان محەممەد شیاع سوودانی، سەرۆکوەزیرانی عێراق و رەجەب تەیب ئەردۆغان، سەرۆککۆماری تورکیا دەکەین، کە هەنگاوێکی مێژووییە لە ڕێڕەوی پەیوەندییەکانی نێوان هەردوو وڵات و ڕێگە بۆ قۆناغێکی نوێی هاوکاری و هاوبەشی ئەمنی و ئابووری و بازرگانی، خۆشدەکات.

- پێمانوایە گەیشتن بە ڕێککەوتن بۆ چارەسەرکردنی کێشەی ئاو، بەهێزکردنی هاوکاری ئەمنی بۆ ڕووبەڕووبوونەوەی هەڕەشە تیرۆریستییەکان، لە سەرووی هەمووشیانەوە ڕێکخراوەکانی داعش و PKK، ئاسایش لە هەردوو وڵات بەهێز دەکات و سەقامگیری لە سەرتاسەری ناوچەکەدا دەچەسپێنێت.

- جەختکردنەوە لەسەر بەردەوامبوون لە پڕۆژەی ڕێگای گەشەپێدان لە چوارچێوەی دەرەنجامەکانی لووتکەی ئەنقەرە، دەتوانێت گۆڕانکاری لە نەخشەی ناوچەکە بەگشتی دروست بکات و پێشینەیەکی ئابووری و بازرگانی و جیۆپۆلیتیکی بێوێنە بە وڵاتەکەمان ببەخشێت.

- هاوڕابوونی بەغدا و ئەنقەرە لە پرسی دەستدرێژی ئیسرائیلی بۆ سەر غەزە و بەیروت و دیمەشق و پێویستی پشتگیریکردنی دەوڵەتی نوێی سووریا بۆ تێپەڕاندنی قۆناغی ڕاگوزەر، کاریگەری ئەرێنی لەسەر یەکخستنی هەڵوێستە هەرێمییەکان لە نێوان هەردوو لادا دەبێت.

- چاوەڕوانین بە زوویی کارەکانی لووتکەکە و ئەو ڕێککەوتنە گەورە و مێژووییانەی پێی گەیشتوون جێبەجێ بکرێن، بۆ بەرژەوەندی هەردوو گەلی عێراق و تورکیا.