بەریتانیا قاچاخچییەكی داواكراوی كورد ڕادەستی پۆلیسی بەلجیکا دەكات

ئاڤا نیوز

دەزگای تاوانی نیشتمانی بەریتانیا، دوای دەستگیركردنی قاچاخچییەكی كورد، ڕادەستی پۆلیسی بەلجیکا دەكاتەوە بەمەبەستی دادگاییكردنی لەسەر كەیسی بەقاچاخبردنی پەنابەران بۆ بەریتانیا.

 

وێنە گەورەكە: حكومەتی بەریتانیا بەهەماهەنگی لەگەڵ هاوبەشە نێودەوڵەتییەكان، هەوڵەكانی چڕ كردووەتەوە بۆ بەئامانجگرتن و لەناوبردنی تۆڕەكانی بەقاچاخبردنی پەنابەران، بۆ ئەم مەبەستەش ئۆپەراسیۆنەكانی ئەوروپای دەزگای تاوانی نیشتمانی بەریتانیا دەستیكردووە بە كۆكردنەوەی زانیاری و دەستگیركردنی سەرجەم ئەو تۆمەتبارانەی كە لە قاچاخچیەتی و بازرگانیكردن بە مرۆڤ، تێوەگلاون.

 

لێدوانی فەرمی: توانا عومەر، چالاكوانی مافی پەنابەران لە بەریتانیا بە ئاڤای ڕاگەیاند، ئەو تۆمەتبارە هاووڵاتیی هەرێمی كوردستانە و تەمەنی 25 ساڵە و دانیشتووی شاری پیتەربۆرۆی بەریتانیایە، گومان دەكرێت ئەندامی گروپێكی تاوانكاریی بەقاچاخبردنی پەنابەران بێت بۆ بەریتانیا.

 

زانیاریی زیاتر: گەنجەكە لە ساڵی ڕابردووەوە لەلایەن دادگای بەلجیکاوە فەرمانی دەستگیركردنی بۆ دەرچووە و دەزگای تاوانی نیشتمانی بەریتانیاش لەسەر فەرمانی حكومەتی ئەو وڵاتە، دەستگیری كردووە.

 

ئەوەی لەبارەیەوە دەگوترێت: دەزگای تاوانی نیشتمانیی بەریتانیا ئاماژە بەوە دەكات، لەڕێگەی سۆشیال میدیا و داتای هێڵەكانی تەلەفۆنەوە، تواندراوە ناسنامەی تۆمەتبارەكە بناسنەوە كە ناوی 'قادر'ـە و لەمانگی ئایاری ساڵی 2023، بە بەلەمی بچووك، ئاوەكانی كەناڵی ئینگلیزی بەزاندووە و خۆی گەیاندووەتە بەریتانیا.