لەڕێگەی نووسراوێکەوە کێشەی جووتیارانی کورد چارەسەر دەکرێت

ئاڤا نیوز

 

سەرۆکوەزیرانی عێراق لەڕێگەی نووسراوێکی فەرمییەوە داوای چارەسەرکردنی کێشەی جووتیارانی کورد لە کەرکووک دەکات، بڕیاریشە هەفتەی داهاتوو لیژنەیەک بۆ هەمان مەبەست پێکبهێنرێت.

‎وێنە گەورەکە: محەممەد شیاع سودانی، سەرۆکوەزیرانی عێراق، نوسراوێکی ئاڕاستەی ئیدارەی کەرکووک کردووە و داوا دەکات، کێشەی جووتیارانی سنووری سەرگەڕان چارەسەر بکرێت.  جگە لەو 11 پارچە زەوییەی کە کێشەی لەسەرە، جووتیاران دەتوانن لە تەواوی زەوی و زارەکانی دیکە زەویییەکە بکێڵن و کاری کشتوکاڵی تێدا بکەن. هەروەها بڕیارە لەم چەند ڕۆژە لیژنەیەکی کشتوکاڵی لە کەرکووک پێکبهێنرێت و لە هەفتەی داهاتوو بۆ هەمان مەبەست دەست بە کار دەبن.

 

زانیاریی تایبەت: بەپێی زانیاریەکانی ئاڤا هەفتەی داهاتوو لیژنە کشتوکاڵیەکە  دەست بە کار دەبن و دەیانەوێت لە کەمترین ماوەدا کێشەکان چارەسەر بکەن.

 
ڕێککەوتنەکە بەمشێوەیە: ئامانجی سەرەکی لیژنەکە ئەو زەویانەیە کە کێشەی لەسەر نییە و بووەتە قوربانی ئەو زەویانەی کێشەی لە سەرە، بۆ نموونە گوندی خەرابە زەوییەکانی بە کوژاوە ناودەبرێت و کێشەی دیکەی  نییە، بەڵام هاوشێوەی ئەو چوار گوندەی دیکە سوپا ڕێگرە لە کاری کشتوکاڵی لەو ناوچانە.

 

زانیاریی زیاتر: لە سەر داوای ڕێبوار تەها، پارێزگاری کەرکووک جووتیارانی سنووری سەرگەڕان بانگهێشتی بینای پارێزگا کران، تاوەکو ڕاسپاردەی سەرۆکایەتیی ئەنجوومەنی وەزیران بە جووتیاران بگەیەنێت.