عێراق سەرجەم هێزە ئەمنییەکانی دەخاتە دۆخی ئەوپەڕی ئامادەباشییەوە

ئاڤا نیوز

 

بۆ دەستەبەرکردنی ئاسایشی لووتکەی عەرەبی، لە یەکشەممەی داهاتووەوە و تا کۆتایی لووتکەی عەرەبی، عێراق سەرجەم هێزە ئەمنییەکانی دەخاتە دۆخی ئەو پەڕی ئامادەباشییەوە.

 

وێنە گەورەکە: بڕیارە لە 17-5-2025، لووتکەی عەرەبی بە بەشداریی سەرۆک و پادشا و بەرپرسانی باڵای وڵاتانی عەرەبی لە شاری بەغدا بەڕێوەبچێت، بۆ ئەو مەبەستەش تا ئێستا عێراق داوەتنامەی فەرمی بۆ زۆرێک لەو سەرکردانە ڕەوانە کردووە.

 

ڕاگەیێنراوی فەرمی: فەرماندەیی ئۆپەراسیۆنە هاوبەشەکانی عێراق ڕایگەیاند: سەرجەم یەکەکانی وەزارەتی بەرگری و وەزارەتی ناوخۆ و دەزگا ئەمنییەکانی دیکەی وڵات لە 11-5-2025، دەخرێنە دۆخی ئەوپەڕی  ئامادەباشی ناسراو بە (ج) و تاوەکو کۆتایی لووتکەی عەرەبی بەردەوام دەبێت.

 

لەلایەکی دیکەوە: وەزارەتی ناوخۆی عێراق، چەند ڕاسپاردەیەکی سەبارەت بە هەماهەنگی نێوان هەموو یەکە ئەمنییەکان کە لەو ئەرکەدا ئامادە دەبن دەرکرد، لەنێویاندا دوورکەوتنەوە لە دیمەنی چەکداری و ئاسانکردنی هاتووچۆی ئۆتۆمبێلەکان و دروستنەکردنی هیچ قەرەباڵغییەکی هاتووچۆ.

 

ئەمەش بزانە: ئەم لووتکەیە دەبێتە چوارەمین لووتکەی عەرەبی کە لە عێراق بەڕێوەدەچێت، دوای لووتکەی ساڵانی 1978، 1990 و 2012. بەمەش، 13 ساڵ دوای دوایین لووتکە، عێراق جارێکی دیکە میوانداری ئەم کۆبوونەوە گرنگە دەکات.