دەستپاکیی عێراق: عێراق هەوڵ دەدات پارە بە تاڵان براوەکان بگەڕێنێتەوە

ئاڤا نیوز

سەرۆکی دەستەی دەستپاکیی عێراق ئاشکرای دەکات، عێراق بەردەوامە لە هەوڵدان لەگەڵ وڵاتان لەپێناو گەڕاندنەوەی ئەو پارانەی لە ساڵانی ڕابردوودا بە تاڵان براون، وتیشی، ساڵی ڕابردوو نیو ملیار دۆلار گەڕێنراونەتەوە.

وێنە گەورەکە: گەندەڵی لە دوای ساڵی 2003ـەوە لە عێراق لە هەموو دامەزراوەکانی حکومەت بووەتە دیاردە، دەستەی دەستپاکیش ناوە ناوە دۆسییە گومانلێکراوەکان هەڵدەداتەوە، دواتریش دۆسییەکان ئاڕاستەی دادگا دەکرێن.

لێدوانی فەرمی: محەممەد لامی، سەرۆکی دەستەی دەستپاکیی عێراق ڕایگەیاند: بە هاوکاریی حکومەت و دادگە لە ساڵی 2024ـدا نیو ملیار دۆلار پارەی بەتاڵان براو گەڕێنراوەتەوە وڵات، ئاماژەی بەوەشکرد، دەستەکە ئیمتیاز و پاراستنی بۆ ئەو کەسانە دابین کردووە کە هاوکار دەبن لە ئاشکراکردنی دۆسیەکانی گەندەڵی.

ئەوەی پێویستە بیزانیت: هەر لە مانگی ڕابردوودا، لە پارێزگای زیقاری باشووری عێراق، گەندەڵییەک بە قەبارەی 100 مليار دينار ئاشکرا کرا، کە تێیدا بەشێک لە فەرمانبەرانی شارەوانیی و خانووبەرە یارییان بە نرخی زەوییەکانەوە کردووە و بەهۆیەوە 100 مليار ديناریان بەهەدەرداوە.