گەڕی چوارەمی دانوستانەکانی نێوان ئێران و ئەمریکا دەستپێدەکات

ئاڤا نیوز

 

بڕیارە ئەمڕۆ یەکشەممە، ئەمریکا و ئێران چوارەم خولی دانوستانە ناڕاستەوخۆکانیان سەبارەت بە بەرنامە ئەتۆمییەکەی تاران لە مەسقەتی پایتەختی عومان ئەنجام بدەن.  

 

چیرۆکی سەرەکی: ڕۆژی 12-4-2025، یەکەم خولی دانوستانی ناڕاستەوخۆ لە نێوان ئەمریکا و ئێران لە شاری مەسقەتی عومان بەڕێوەچوو، سێ جاری دیکەش دانوستانی ناڕاستەوخۆ ئەنجام دراوە بەڵام تاوەکو ئێستا هیچ وردەکارییەکیان ئاشکرا نەکردووە و تەنیا جەختیان لەوە کردووەتەوە دانوستانەکانیان ئەرێنی بوون.

 

ئەوەی پێویستە بیزانیت: خولی چوارەمی دانوستانەکان لە سەرەتادا بڕیار بوو لە 3ی ئایار لە ڕۆما بەڕێوە بچێت، بەڵام دواتر  دواخرا و بڕیار درا لە مەسقەتی پایتەختی عومان بەردەوام بێت.

 

لێدوانی فەرمی: ڕۆژی شەممە عەباس عەراقچی، وەزیری دەرەوەی ئێران ڕایگەیاند، ئەگەر ئامانجی ئەمریکا لە دانوستان لەگەڵ ئێران بێبەشکردنی "مافی ئەتۆمی" بێت، ئەوا دەبێت واشنتن بزانێت تاران هەرگیز دەستبەرداری ئەو مافانە نابێت.

 

زانیاریی زیاتر: نوێنەرانی هەردوو وڵات تاوەکو ئێستا سێ جار کۆبوونەوەی ناڕاستەوخۆیان کردووە، دوو جار لە مەسقەت و جارێک لە ڕۆما، کە سەبارەت بە بەرنامە ئەتۆمییەکەی ئێران کۆبوونەتەوە. لە کۆبوونەوەی ئەمجارەشدا هەر یەکە لە ستیڤ ویتکۆف، نێردەی تایبەتی سەرۆکی ئەمریکا بۆ ڕۆژهەڵاتی ناوەڕاست و عەباس عێراقچی، وەزیری دەرەوەی ئێران، سەرۆکایەتیی شاندی وڵاتەکانیان دەکەن.