بانکی ناوەندی: لە بەرزکردنەوەی بەهای دینار بەرامبەر دۆلار سەرکەوتوو بووین

ئاڤا نیوز

 

جێگری پارێزگاری بانکی ناوەندیی عێراق دەڵێت، سیاسەتی نەختینەیی بانکی ناوەندی بۆ بەرزکردنەوەی بەهای دینار و دابەزاندنی بەهای دۆلار سەرکەوتنی بەدەستهێناوە، جەختیش دەکاتەوە کە ئەم سیاسەتە لە ماوەی داهاتووشدا بەردەوام دەبێت.

 

وێنە گەورەکە: ماوەی چەند هەفتەیەکە بەهای دینار بەرامبەر دۆلاری ئەمریکی بەشێوەیەکی بەرچاو بەرزبووەتەوە، بەجۆرێک بەهای 100 دۆلار لە زیاتر لە 150 هەزار دینارەوە بۆ 142 هەزار دینار دابەزیووە.

 

لێدوانی فەرمی: عەممار خەڵەف، جێگری پارێزگاری بانکی ناوەندیی عێراق ڕایگەیاند، بەرزبوونەوەی بەهای دینار بەرامبەر دۆلار، سەرکەوتنی سیاسەتی نەختینەیی بانکی ناوەندی دەردەخات بۆ کەمکردنەوەی پشتبەستن بە دەستکەوتنی دۆلار لە بازار و دەستخستنی لە ڕێگەی کەناڵە ڕەسمییەکانەوە کە تیایاندا ڕەچاوی پێوەرە نێودەوڵەتییەکان کراوە.

 

ئاماژەی بەوەشکرد، بانکی ناوەندی لە پاڵپشتیکردنی کەرتی بانکی و بەرزکردنەوەی تواناکانی بەردەوام دەبێت تا ببێتە هۆکارێکی سەرەکی گەشەی ئابووری وڵات، بۆ ئەو مەبەستەش پشتیووانی بانکەکانی ناوخۆ دەکەن تا بتوانن خزمەتگوزاری نوێ و ناوازەی بانکی  بەمەبەستی بۆ پشتیووانی کەرتەکان، ئاسانکاریی پارەدارکردن و ئاڵوگۆڕی دراو بەشێوەی کاش پێشکەش بکەن.

 

لەلایەکی دیکەوە: مەزهەر محەممەد ساڵح، ڕاوێژکاری سەرۆکوەزیرانی عێراق بۆ کاروباری ئابووری بۆ ئاژانسی فەرمی دەڵێت، سیاسەتی بانکی ناوەندی بۆ پارەدارکردنی بازرگانان و خێرایی پرۆسەکە، بە ئاسانیی وەرگرتنی دراوی بیانی لەلایەن بازرگانانی خاوەن پڕۆژە بچووکەکان و گەشتیاران بە نرخی فەرمی، وایکرد خواست لەسەر دۆلار لە بازاردا کەمببێتەوە، هاوکات فراوانکردنی بازرگانی بە دراوە بیانییەکانی دیکەش یەکێکی دیکەیە لە هۆکارەکانی بەرزبوونەوەی بەهای دینار.