کۆڵبەرێکی کورد بە تەقەی ڕاستەوخۆی هێزە چەکدارەکانی ئێران گیانی لەدەستدا

ئاڤا نیوز

 

لە ناوچەی سنووریی "دووپلوورەی" سەر بە شاری مەریوان تەقە لە کۆڵبەرێکی کورد دەکرێت و بەهۆیەوە گیان لەدەست دەدات.

 

بڵاوکراوەی فەرمی: ڕیکخراوی مافی مرۆڤی هەنگاو ڕایگەیاند، ئارمان ڕایزەن، کۆڵبەری گەنجی خەڵکی شاری مەریوان لە ئەنجامی تەقەی ڕاستەوخۆی هێزە چەکدارەکانی کۆماری ئیسلامیی ئێران گیانی لەدەست داوە.

 

ئەوەی پێویستە بیزانیت: "ئارمان ڕایزەن"ـی تەمەن 32 ساڵ، باوکی دوو منداڵە و خەڵکی گوندی "گۆگجە"ـی سەر بە شاری مەریوانە، لەگەڵ چەند کوڵبەرێکی دیکە لە ناوچەی سنووریی "دووپلوورە"ی سەر بە شاری مەریوان کراوەتە ئامانجی تەقەی ڕاستەوخۆ و گیانی لەدەستداوە، دواتر تەرمەکەی بۆ نەخۆشخانەی مەریوان گواستراوەتەوە.

 

لەلایەکی دیکەوە: ڕۆژی پێنجشەممە 8-5-2025، كاتژمێر 5ـی بەرەبەیانی لە گوندی سوورەبان كە دەكەوێتە سەر سنووری نێوان باشوور و ڕۆژهەڵاتی كوردستان لە سنووری شارباژێڕی سلێمانی، لەلایەن پاسەوانی سنووری عێراق دەستڕێژی گولـلە لە باوك و كوڕێك کرا، بەهۆیەوە کورەکە گیانی لەدەستدا، دواتر باوکی کورەکە گوتی: بە بەرچاومەوە تەقەیان لە کورەکەم کرد و کوشتیان.

 

باکگراوند: بە پشتبەستن بە ئامارە تۆمارکراوەکان لە ناوەندی ئامار و بەڵگەنامەکانی ڕێکخراوی مافی مرۆڤی هەنگاو، لە ماوەی ساڵی 2024 لانی کەم 339 کۆڵبەر و کاسبکاری کورد لە سنوورەکانی کوردستان کوژراون یان بریندارکراون.