خانەنشینی هەرێم بۆ فەرمانبەران: تا نەگەنە بەرواری لەدایکبوونتان خانەنشین ناکرێن

ئاڤا نیوز

 

دەنگۆیەک بڵاوبووەتەوە کە بەهۆی هەڵەیەک دەیان فەرمانبەر پێش تەمەنی 60 ساڵی خانەنشین بوون، بەڕێوەبەرایەتیی خانەنشینیش ڕوونکردنەوەی لەسەر دەدات و دەڵێت، بەگوێرەی یاساکە بەرواری لەدایکبوون هەژمار دەکرێت.

 

وێنە گەورەکە: تەمەنی خانەنشینی هەرێمی کوردستان هاوتای خانەنشینی عێراق کراوە و فەرمانبەران لە تەمەنی 60 ساڵی خانەنشین دەکرێن، لەسەرەتای ئەمساڵەوە پرۆسەکە دەستیپێکردووە و سەرووی 25 هەزار کەس دەگرێتەوە، بەشێکیان مامەڵەکانیان تەواوبوون و خانەنشین بوون.

 

ئەوەی لەبارەیەوە دەگوترێت: بەگوێرەی ڕێکارە نوێیەکان لەدایکبووانی ساڵی 1965 دەتوانن خانەنشین بن، دەنگۆی ئەوەی هەیە ژمارەیەک فەرمانبەر پێش 60 ساڵی و لە 59 ساڵیدا خانەنشین کراون.

زانیاریی تایبەت: سەرچاوەیەکی باڵا لە بەڕێوەبەرایەتیی گشتیی خانەنشینی هەرێمی کوردستان بە ئاڤای گوت، "ئەوانەی لە دایکبوووی 1965 ـن، تاوەکو نەگاتە بەراوری لەدایکبوونیان خانەنشین نابن و وەک فەرمانبەر مامەڵەیان لەگەڵ دەکرێت، واتا کەسێک مانگی 7 لەدایکبووبێت تاوەکو دوو مانگی دیکە دەتوانێت وەک فەرمانبەر بمێنێتەوە ئینجا مامەڵەی خانەنشینبوون بکات."