دوای ڕاگەیاندنی ترەمپ بە ڕێککەوتن لەگەڵ چین نرخی زێڕ 2% دابەزی

ئاڤا نیوز

نرخی زێڕ لە مامەڵەکانی یەکەم ڕۆژی هەفتەیدا بەڕێژەی 2% بۆ ئاستی 3225 دۆلار دابەزی. لە بازاڕەکانی ناوخۆش نرخی مسقاڵێك زێڕی عەیار 21 بۆ 655 هەزار دۆلار دابەزی.

هۆکارە زانراوەکان: هۆکاری سەرەکی دابەزینی نرخی زێر، بۆ دانوستاندنە بازرگانییەکانی واشنتن و پەکین لە سوویسرا دەگەڕێتەوە، بە تایبەت دوای ئەوەی سکۆت بیسنت، وەزیری گەنجینەی ئەمریکا ڕایگەیاند، گفتوگۆکان بوونیادنەرانە بووە.

لەلایەکی دیکەوە: لایەنی ئەمریکا زۆر بە پەرۆشەوە لە لێدوانەکەی ترەمپ دەڕوانن کە ڕایگەیاند، پێناسی گومرگی سەر هاوردەی کاڵای چینی بۆ 80% دادەبەزێنن.

ئەوەی پێشبینی دەکرێت: سەرەڕای ئەو دابەزینە، بەڵام شرۆڤەکارانی بانکی 'جەی پی مۆرگانی' ئەمریکی هۆشداری دەدەن و پێشبینی دەکەن نرخی ئۆنسێک زێڕ لە ساڵی 2029 بۆ ئاستی 6 هەزار دۆلار بەرزبێتەوە، واتە دوو هێندەی نرخی ئێستای.

ئەمە لە کاتێکدایە لە دەستپێکی ئەمساڵەوە نرخی زێڕ سەدا 20 بەرزبووەتەوە و بەراورد بە سێ ساڵی ڕابردووی نرخەکەی دوو هێندە بووە.