فایلی خەڵک؛ دوای بەدواداچوونی ئاڤا دەرمان و چارەسەری پێویست بۆ نەخۆشێک دابین دەکرێت

ئاڤا نیوز

دوای بەدواداچوونی ئاڤامیدیا، بەشی چەند مانگێک دەرمان و چارەسەری پێویست بۆ نەخۆشێک دابین دەکرێت.

وێنە گەورەکە: ئەمڕۆ کەسێک بە ناوی شوان سەعید پەیوەندی بە ئاڤاوە کردووە، گوتوویەتی، "وەزعم زۆر خراپە، خاوەنی پێنج منداڵم و لە کرێدا دەژیم، نەشتەرگەریی قەستەرە و باڵۆن و شەبەکەم بۆ کراوە، لە شەممەی ڕابردووە دەرمانەکانم لێ بڕاون.

خۆی وتوویەتی هەموو دەرمانەکانم بایی 113 هەزار و 500 دینارە لە سەنتەری دڵ، کەس شک نابەم و هانام بۆ ئاڤا هێناوە کە خەمخۆری خەڵک و شارن بەڵکو بۆم دابین بکەن.

لێدوانی فەرمی: ئاڤا پەیوەندی بە وەزارەتی تەندروستییەوە کرد، د.مەعاف عەبدوڵڵا، بەڕێوەبەری گشتیی کاروباری کارگێڕی و دارایی لە وەزارەتەکە بە ئاڤای گوت: چارەسەری مانگێكم بۆ دابین كردووە و پەیوەندیم بەو نەخۆشەوە كردووە كە بێت وەری بگرێت، چارەسەری چەند مانگێكی دیكەیشی بۆ دابین دەكەم.