بەهۆی خۆڵبارینەوە 113 کەس لە کەرکووک و هەرێمی کوردستان سەردانی نەخۆشخانەکانیان کردووە

ئاڤا نیوز

 

شەپۆلێكی چڕی خۆڵبارین لە دوێنێوە جارێکی دیکە عێراق و هەرێمی کوردستانی گرتەوە و لە ئەمڕۆوە كاریگەرییەكەی لاواز دەبێت، سبەینێش لە هەندێک ناوچەی کوردستان ئەگەری بەفر و بارانبارین هەیە.

 

وێنە گەورەکە: عێراق یه‌كێكه‌ له‌و وڵاتانه‌ی کە زۆرترین زیانی گۆڕانکارییەکانی کەشوهەوای بەرکەوتووە، بەو هۆیەشەوە ئەمساڵ چەند جارێک خۆڵبارینی چڕ ڕووی لە زۆربه‌ی پارێزگاکانی ناوەڕاست و باشووری عێراق کردووە، کاریگەرییەکەی لە هەرێمی کوردستانیش دەرکەوتووە.

 

کاریگەری و لێکەوتەکان: بەهۆی کاریگەری خۆڵبارینەکەوە، لە کەرکووک و هەرێمی کوردستان تاوەکو ئێستا 113 کەس سەردانی نەخۆشخانەکانیان کردووە و چارەسەری پێویستیان بۆ کراوە، داتاکانی سەردانی نەخۆشخانەکانیش بەپێی شارەکان بەم جۆرەیە:

کەرکووک: 48 کەس.
دهۆک: 30 کەس.
سلێمانی: 12 کەس.
هەولێر: 8 کەس.
هەڵەبجە: 15 کەس.

 

لێدوانی فەرمی: سەعد کەمال، بەڕێوەبەری کارگێریی نەخۆشخانەی ڕزگاری هەولێر بە ئاڤای گوت، "ئەو کەسانەی لە هەولێر بەهۆی خۆڵبارینەوە تەندروستییان تێکچووە، دووانیان لە نەخۆشخانە ماونەتەوە و دوای وەرگرتنی چارەسەر ڕەوانەی ماڵەوە کراونەتەوە."

 

لەلایەکی دیکەوە: لەبارەی ڕەوشی کەشوهەوا و وادەی تەواوبوونی شەپۆلی خۆڵبارینەکەش، شێخ دارا، شارەزای کەشناسی و پێشكەشكاری كەشوهەوای ئاڤا میدیا ڕایگەیاند، "خۆڵبارین سێ جۆری هەیە ئەمەی ئێستا كە لە هەرێمی كوردستان هەیە جۆری سێهەمییەتی و چڕترین جۆرە و پێی دەگوترێت خۆڵبارین بە هۆی باوە، كە لە دێرەزوورەوە هەڵی كردووە و هەرێمی كوردستانی گرتووەتەوە".

 

گووتیشی، "ئەم شەپۆڵی خۆڵبارینە دوو ڕۆژ دەخایێنێت بەڵام لە ئەمڕۆوە كاریگەرییەكەی لاوازتر دەبێت، ئەمەش بەهۆی ئەوەی كە لە چەند ناوچەیەك بەتایبەت پارێزگاكانی هەولێر و دهۆك باران دەبارێت، سبەینێش لەگەڵ بارینی باران، ئەگەری بەفربارینیش هەیە لە ناوچە شاخاوییە بەرزەكان بەتایبەت چیاكانی گارە، حەسەنبەگ، شیرین".

 

لەبارەی پلەکانی گەرماش، شێخ دارا ڕایگەیاند، "تاوەکو كۆتایی مانگ پلەكانی گەرما لە سەرانسەری هەرێمی كوردستان لەژێر 30 پلەدا دەبێت و کەشوهەوا گەرم نایێت".