بۆ یەکەمجارە لە سلێمانی کۆڕبەندێکی جیهانی بەڕێوەدەچێت

ئاڤا نیوز

بڕیارە لە ڕۆژانی هەفتەی داهاتوو بەسەرپەرشتی وەزارەتی دەرەوەی یۆنان کۆڕبەندی دێڵفی – سلێمانی بەڕێوەبچێت کە تێیدا ژمارەیەک کەسایەتی و خاوەن سەرمایەکانی جیهان بەشداردەبن.

وێنە گەورەکە: کۆڕبەندی ئابوری دێڵفی، کۆڕبەندێکی ستراتیژییە بۆ گفتوگۆ و هەماهەنگی و گەشەپێدانی هەرێمایەتیی کە تێیدا تاوتوێی بوارەکانی ئاسایش، وزەی بەردەوام، هەمەچەشنیی ئابوری و دواپێشهاتەکان دەکات، جەخت لەسەر دەرفەتەکانی وەبەرهێنانیش دەکات.

لێدوانی فەرمی: سەرچاوەیەک لە پارێزگای سلێمانی، بە ئاڤا میدیای ڕاگەیاند، بڕیارە لە ڕۆژانی 18 و 19ـی هەفتەی داهاتوو بەسەرپەرشتی وەزارەتی دەرەوەی یۆنان، کۆڕبەندی دێڵفی-سلێمانی بەڕێوەبچێت. هاوکات کۆڕبەندەکە دەستپێشخەرییەکی نوێیە بۆ دیالۆگ لەسەر ئاستی جیهان و بە تایبەتی لە ڕۆژهەڵاتی ناوەڕاست کە یەکەمجارە لەشاری سلێمانی دەبەسترێت.

زانیاریی بەدەستهاتوو: کۆڕبەندەکە بە هەماهەنگیی لەگەڵ حکومەتی هەرێمی کوردستان و بە سەرپەرشتیی سکرتاریەتی گشتیی پەیوەندییە نێودەوڵەتییەکان و دێسکی دەرەوەی وەزارەتی دەرەوەی یۆنان و ئاژانسی یۆنانی (ئینتەرپرایس گریس)، بەڕێوەدەچێت.

ئەوەی پێویستە بیزانیت: بڕیارە ژمارەیەک کەسایەتی لە عیراق و یۆنان و جیهان و گەورە بازرگانان و خاوەن سەرمایەکانی جیهان بەشداردەبن بۆ داڕشتنی سیاسەت و ستراتیژی بازرگانی و هێنانەکایەی هەماهەنگی لە ناوچەکەدا.