قوباد تاڵەبانی بەرگری لە پڕۆژەکانی ڕووناکی و هەژماری من دەکات: خۆشبەختانە سەرجەم سنووری سلێمانی دەگرنەوە

ئاڤا نیوز

 

قوباد تاڵەبانی، جێگری سەرۆکوەزیران بەرگری لە پڕۆژەکانی  هەژماری من و پڕۆژەی ڕووناکی دەکات و دەڵێت: خۆشبەختانە هەموو ئەو تێبینیانەی هەبوون چارەسەر کراون و لە تەواوی سنووری سلێمانی جێبەجێ دەکرێن.
 
وێنە گەورەکە: هەژماری من بۆ بەبانکیکردنی مووچە و پڕۆژەی ڕووناکی بۆ کارەبای 24 کاتژمێری دوو خزمەتگوزاریی گرنگی کابینەی نۆیەمی حکومەتی هەرێمی کوردستانن.

بەپێی زانیارییەکانی ئاڤا، لە کۆبوونەوەکانی یەکێتی و پارتی بۆ پێکهێنانی کابینەی 10ی حکومەتی هەرێمی کوردستان گفتوگۆ لەبارەی هەردوو پڕۆژەکە و بەتایبەت هەژماری من کراوە، دوای گفتوگۆکانیش یەکێتی پشتیوانی بۆ دەربڕین.

ئەوەی پێویستە بیزانیت: هەر لە سەرەتاوە یەکێتی لە بەرامبەر پڕۆژەی هەژماری من بانگەشەیان بۆ پڕۆژەی تەوتینی حکومەتی عێراق دەکرد، لە بانگەشەی هەڵبژاردنی پەرلەمانی کوردستانیش کە کۆتایی ساڵی ڕابردوو کرا، ئەم بابەتە زیاتر زەق کرایەوە، بەڵام لەبارەی پڕۆژەی ڕووناکی لە سنووری سلێمانی و دەوروبەری بە ئاشكرا هیچ ڕێگرییەکی لێ نەکرا.

لێدوانی فەرمی: قوباد تاڵەبانی، جێگری سەرۆکوەزیرانی هەرێمی کوردستان لە کۆنگرەیەکی ڕۆژنامەوانیدا لە سلێمانی ڕایگەیاند، تێبینییەکی زۆر هەبوو لەسەر پڕۆژەی هەژماری من، خۆشبەختانە هەموو ئەو تێبینیانەی هەبوون چارەسەر بوون، پڕۆژەکە لە تەواوی سنووری سلێمانی جێبەجێ دەکرێت.

لەلایەکی دیکەوە: جێگری سەرۆکوەزیران لەبارەی پڕۆژەی ڕووناکی ڕایگەیاند: خەڵک تەنها سەیری ئەو پارەیە دەکات کە لەلایەن حکومەتەوە دیاریکراوە و سەیری پارەی مۆلیدە نەکراوە کە مانگانە لەسەر هاووڵاتیان حیسابە، پێموایە ئەو پڕۆژەیە لە بەرژەوەندی هاووڵاتییانی کەمدەرامەتە. 

 

لەبارەی نرخی کارەبای 24 کاتژمێری قوباد تاڵەبانی بە ئەرێنییەوە باسی کرد و گوتی: "تیمە هونەرییەكان بەرچاوڕوونییەکی زۆریان لەبارەی پڕۆژەی ڕووناکی و نرخەكان پێداوین، بۆیە پەسندمان كردووە، چونكە لە بەرژوەندی هەموو خەڵكە، کارەبایەکی باشتر بە تێچوویەکی کەمتر بە خەڵک دەدرێت، ئەوەی خانووی گەورەتر بێت و پێویستی بە كارەبای زیاتر هەبێت، بێگومان پارەی زیاتری كارەبا دەدات".

ژمارەکان وادەڵێن: تاوەکو ئێستا 735 هەزار مووچەخۆر لە پڕۆژەی هەژماری من تۆمارکراون، زیاتر لە 250 هەزار کەسیش ماون و زۆربەیان لە سنووری سلێمانین. تەیف سامی، وەزیری دارایی عێراق هۆشداری داوە ئەگەر تاوەکو کۆتایی ئەمساڵ سەرجەم مووچەخۆران نەبنە خاوەن هەژماری بانکی، ئەوا لە 1-1-2026 ەوە مووچەیان ڕادەگیرێت.

پڕۆژەی ڕووناکیش نزیکەی ساڵێکە لە سەنتەری پارێزگاکانی هەولێر و سلێمانی و دهۆک دەستی پێ کردووە، تاوەکو ئێستا زیاتر لە 600 هەزار هاونیشتمانی  کارەبایان کراوەتە 24 کاتژمێری، بڕیاریشە تاوەکو کۆتایی ساڵی 2026 بگاتە سەرتاسەری هەرێمی کوردستان.