ژووری بازرگانی ئەمریکا: بە سەردانەکەی مەسرور بارزانی قۆناغێکی نوێ لە پەیوەندییەکانی ئەمریکا و کوردستان دەستپێدەکات

ئاڤا نیوز

سەرۆکی ژووری بازرگانی ئەمریکا لە هەرێمی کوردستان واژۆکردنی دوو ڕێککەوتنامەکەی نێوان هەرێمی کوردستان و کۆمپانیا ئەمریکییەکان بە قۆناغێکی نوێ لە پەیوەندییە ئابوری و بازرگانیەکانی نێوان کوردستان و ئەمریکا ناوزەند دەکات.

وێنە گەورەکە: لە چوارچێوەی سەردانەکەی مەسرور بارزانی، سەرۆکوەزیرانی هەرێمی کوردستان بۆ ئەمریکا و لە هەنگاوێکی گرنگدا دوو گرێبەستی بەرهەمهێنانی غازی سروشتی لە نێوان هەرێمی کوردستان و هەردوو کۆمپانیای ئەمریکی "HKN ENERGY, WESTERNZAGROS" کرا، ئەنجامدانی گرێبەستەکان کاردانەوەی نێودەوڵەتی و هەرێمی بە دوای خۆیدا هێنا و بە هەنگاوێکی گرنگ بۆ ئابووری هەرێمی کوردستان و قۆناغێکی نوێ لە پەیوەندییەکانی نێوان ئەمریکا و کوردستان ناوزەند دەکرێت.

لێدوانی فەرمی: دووری ئەبو زەید، سەرۆکی ژووری بازرگانی ئەمریکا لە کوردستان لە گەشتی هەواڵەکانی ئاڤا میدیا میوان بوو، سەبارەت بە گرێبەستەکانی نێوان حکومەتی هەرێمی کوردستان و کۆمپانیا ئەمریکییەکان ڕایگەیاند: ئەنجامدانی دوو گرێبەستی مەزن لە بواری بەرهەمهێنانی غازی سروشتی و پەرەپێدانی کێڵگە نەوتییەکان سەرەتای بونیادنانی ئابورییەکی بەهێز دەبێت بۆ هەرێمی کوردستان، ئەم هەنگاوە گرنگییەکی مەزنی بۆ ژووری بازرگانی ئەمریکا لە هەرێمی کوردستان و واشنتن هەیە، بە سەردانەکەی سەرۆکوەزیران قۆناغێکی نوێ لە پەیوەندییەکانی ئەمریکا و کوردستان دەستپێدەکات.

- بە دەستپێکردنی بەرهەمهێنانی کۆمپانیا ئەمریکییەکان قۆناغی هاتنی کۆمپانیا بیانییەکان بۆ هەرێمی کوردستان دەستپێدەکات و وەبەرهێنان لە کەرتی وزە و نەوت و کەرتەکانی دیکە لە هەرێمی کوردستان دەبێت بە بنەمایەکی گرنگ بۆ پەرەپێدانی ئابوری و بازرگانی لە ئاستی هەرێمی و نێودەوڵەتیدا.