مووچەی هەزاران خانەنشین و کەمئەندامانی سەنگەر ڕادەگیرێت

ئاڤا نیوز

 

مانگێکە مووچەی هەزاران خانەنشین و کەمئەندامی سەنگەر و پەککەوتووانی شەڕی داعش ڕاگیراوە. هۆکارەکەشی گواستنەوەی دۆسییەکانیانە بۆ سەر وەزارەتی دارایی و بەڕێوەبەرایەتیی گشتیی خانەنشینی.

 

لێدوانی فەرمی: حاجی مەلا ئەمین، بەڕێوەبەری گشتیی خانەنشینی و كەمئەندامان لە وەزارەتی پێشمەرگە بە ئاڤای گوت: چاوەڕێین یەکەکانی 70 و 80 دۆسیەی هەموو مووچەخۆرانیان بۆ بنێرن، بۆ ئەوەی ناوی ئەوانیش لە سیستمی پەیڕۆل داخڵ بکەن.

هۆکارە زانراوەکان: هۆکاری دابەشنەکردنی مووچەی ئەو مووچەخۆرانە، گواستنەوەی دۆسیەکانیانە لە یەکەکانی 70 و 80 بۆ سەر وەزارەتی دارایی و بەڕێوەبەرایەتیی گشتیی خانەنشینی.`

ئەوەی پێویستە بیزانیت: چەند مانگێکە پرۆسەی گواستنەوەی دۆسیەکانیان بەردەوامە، بڕیار دراوە دۆسیەی هەموو مووچەخۆران لەدەست وەزارەتی دارایی بێت.

تاوەکو ئێستاش مامەڵەی هەزاران مووچەخۆر تەواوکراون و دۆسیەیان گواستراوەتەوە، بەشێکیشیان لە قۆناغی گواستنەوەدان.

 

خاڵە ئەرێنییەکان: بەهۆی پرۆسەکە ماوەیەک مووچەی بەشێکی ئەو مووچەخۆرانە دوا دەکەوێت، بەڵام نافەوتێت.

 

هەر مانگێک مووچەیان بەسترا، مووچەی سەرجەم مانگەکانی دیکەش بەیەکەوە وەردەگرن.