سندووقی دراو ڕاپۆرتێک لەبارەی دۆخی دارایی عێراق بڵاودەکاتەوە

ئاڤا نیوز

 

سندووقی دراوی نێودەوڵەتی پێشبینی دەکات بەهۆی دابەزینی بەهای نەوت و کۆتوبەندەکانی هاوکاریی دارایی دەرەکی، ئابووری عێراق ڕووبەڕووی ئاستەنگی گەورەببێتەوە و گەشەی ئابووریش ڕوو لە دابەزین بکات.

 

بۆچی گرنگە: قەبارەی بودجەی ئەمساڵی عێراق بە نزیکەیی 210 تریلیۆن دینار خەمڵێنراوە، ئەگەریش تێکڕای فرۆشتنی نەوت بە 70 دۆلاربێت، هێشتا حکومەتی فیدڕاڵ 63 تریلیۆن دینار کورتهێنانی دەبێت.

 

ڕاگەیێنراوی فەرمی: سندووقی دراوی نێودەوڵەتی لە کۆتا ڕاپۆرتی خۆیدا ئەوەی خستووەتەڕوو، ساڵی 2023 تێکڕای گەشەی کەرتی نانەوتی 13.8% بووە، بەڵام ساڵی ڕابردوو بۆ 2.5 % دابەزیووە، ئەوەش بەهۆی لاوازبوونی وەبەرهێنان، پاشەکشەی کەرتی خزمەتگوزارییەکان و لاوازی هاوسەنگی بازرگانی.

 

بەگوێرەی ڕاپۆرتەکە، کورتهێنانی بودجە ساڵی 2023 کەم بووە و 1.1%ی تێکڕای داهاتی نیشتمانی بووە، ساڵی ڕابردوو بڕەکە بۆ 4.2% بەرزبووەتەوە، ئەوەش بەهۆی زیادکردنی خەرجییەکانی پەیوەست بە پابەندییەکان، مووچە و وزە، سندوقی دراو پێشبینی دەکات ئەمساڵیش گەشەی کەرتی نانەوتی لە عێراق بەهۆی دۆخی ئابووریی جیهانییەوە لاوازبێت.

 

کاریگەریی و لێکەوتەکان: دابەزینی نرخی نەوت و کۆتوبەندەکانی هاوکاریی دارایی دەرەوە کاریگەری لەسەر کەمبوونەوەی یەدەگی دراوی بیانی عێراق هەبووە کە کۆتایی ساڵی ڕابردوو 100.3 ملیار دۆلار بووە. بەهۆی لاوازی کەرتی تایبەت و زیادبوونی خەرجییەکانیش، سندوقی دراو داوا دەکات چاکسازیی لە خەرجییە گشتییەکان بکرێت و ڕووبەری دارایی نوێ دروستبکرێن.

 

چارەسەرەکان: سندووقی دراو دەڵێت، پێویستە بانکی ناوەندی پاڵپشتییەکانی بۆ پڕکردنەوەی کورتهێنانی حکومەت ڕابگرێت، وەبەرهێنانی پاک و کەمخەرجی لە وزەدا بکرێت، بۆ ڕووبەڕووبوونەوەی گەندەڵی لێپرسینەوە و چاودێریی بەهێزتر بکرێت و چاکسازیی بنەڕەتیش لە کەرتی تایبەت و بازاڕی کاردا بکرێت.