سوودانی جارێکی دیکە لەگەڵ لایەنە براوەکانی کەرکووک کۆدەبێتەوە

ئاڤا نیوز
 
محەممەد شیاع سوودانی، سەرۆکوەزیرانی عێراق جارێکی دیکە لەگەڵ سەرجەم لایەنەکان و پێکهاتە سیاسییەکانی کەرکووک لە شاری بەغدا کۆدەبێتەوە. 

زانیاریی تایبەت: ڕۆکان جاف، پەیامنێری ئاڤا میدیا لە کەرکووک ڕایگەیاند: ئەمڕۆ یەکشەممە 17-03-2024، محەممەد شیاع سوودانی لەگەڵ یەکێتیی نیشتمانی کوردستان، پارتی دیموکراتی کوردستان، پێکهاتەی تورکمان و حیزبە عەرەبییەکان لە کەرکووک کۆدەبێتەوە.

بۆچی گرنگە: کۆبوونەوەکە بەمەبەستی لێکتێگەیشتن و چارەسەرکردنی پێکهێنانی حکومەتی خۆجێییە لە کەرکووک، کە تاوەکو ئێستا پۆستەکانی ئەو پارێزگایە یەکلانەبوونەتەوە، تەنیا پارێزگاکانی کەرکووک و دیالە ماون کە پارێزگار و پۆستەکانی دیکە دابەش بکرێن.

ئەوەی پێویستە بیزانیت: لە 22ـی شوبات سوودانی لەگەڵ لایەنە براوەکانی کەرکووک ڕێککەوت لەسەر ئەوەی سەرجەم لایەنەکان بە هاوبەشی حکومەتی خۆجێیی پێکبهێنن، کۆبوونەوەی ئەمڕۆش دەبێتە سێیەم کۆبوونەوە لەگەڵ لایەنەکان بیکات.