وەزارەتی دارایی داهاتی ناوخۆی مانگی چواری ڕادەستی بەغدا کرد

ئاڤا نیوز

پێشنیوەڕۆی ئەمڕۆ وەزارەتی دارایی و ئابووری هەرێمی کوردستان، داهاتی ناوخۆی بۆ مانگی چوار خستە سەر هەژماری بانکی لقی هەولێری بانکی ناوەندی عێراق.

وێنە گەورەکە: ڕادەستکردنی 50%ـی داهاتی نانەوتی ناوخۆی هەرێمی کوردستان بە بەغدا، یەکێکە لە خاڵەکانی ڕێککەوتنی ئەمساڵ بۆ ناردنی مووچە، بۆ مانگی سێ  نزیکەی 50 ملیار ڕادەستی بەغدا کرا.

زانیاریی تایبەت: سەرچاوەیەک لە وەزارەتی دارایی بە ئاڤای ڕاگەیاند، تیمەکانمان دوای دەوامیش لە کارکردن بەردەوامن بۆ ئەوەی بەزووترین کات لیستی مووچە ئامادەبێت، بە ئەگەرێکی زۆرەوە ڕۆژی یەکشەممە تەواو دەکرێت. 

 

-سەرەتای هەفتەی داهاتوو، شاندێکی شانێکی تەکنیکی وەزارەتی دارایی لیستی مووچەی مانگی پێنج دەبەن بۆ بەغدا تاوەکو ڕادەستی وەزارەتی دارایی عێراقی بکەن. 

لێدوانی فەرمی: سەرچاوەیەکی باڵا لە وەزارەتی دارایی و ئابووری هەرێمی کوردستان بە ئاڤای گوت، "بەشی گەنجینەی فیدراڵی لەداهاتی ناوخۆی هەرێمی کوردستان بۆ مانگی چوار خرایە سەر هەژماری لقی هەولێری بانکی ناوەندی و بڕەکەی 50 ملیار و 522 ملیۆن 750 هەزار دینارە."

لەلایەکی دیکەوە: سەرچاوەیەک لە لقی هەولێری بانکی ناوەندی بە ئاڤای گوت، "بڕەکە خراوەتە سەر هەژماری بانکیمان".

باکگراوند: بەپێی ڕێكکەوتنی نێوان هەولێر و بەغدا، دەبێت هەرێمی کوردستان مانگانە 50%ـی داهاتی نانەوتی ڕادەستی بەغدا بکات، دوای هەموو 10ـی مانگێکیش دەبێت تەرازووی پێداچوونەوەی مانگی پێشتر ئامادەبکات و ڕەوانەی بەغدای بکات.