کۆڕبەندی ئابووری و بازرگانی لە نێوان کوردستان، فەرەنسا، عێراق بەڕێوەدەچێت

ئاڤا نیوز

 

شاندێکی وەبەرهێنانی هەرێمی کوردستان سەردانی پاریس دەکات، بەمەبەستی بەشداریکردن لە کۆربەندی هاوبەشی بواری بازرگانی و ئابووری.

 

وێنە گەورەکە: حکومەتی هەرێمی کوردستان بەردەوامە لە فرەچەشنکردنی سەرچاوەکانی داهات و هانی کۆمپانیا بیانییەکانیش دەدات وەبەرهێنان لە ناوچە جیاوازەکانی کوردستاندا بکەن، بۆ گەشەپێدان و بووژانەوەی زیاتری كەرتی وەبەرهێنانیش کارئاسانی بۆ وەبەرهێنەر و کۆمپانیا گەورەکان دەکات تاوەکو وەبەرهێنانەکانیان بهێنە ناوچەکان.

 

لێدوانی فەرمی: بەرگەشت ئاکرەیی، وتەبێژی دەستەی وەبەرهێنان بە ئاڤای ڕاگەیاند: کۆربەندەکە لە پاریسی پایتەختی فەرەنسا بەڕێوەدەچێت، هەروەها تایبەتە بە ئابووری و وەبەرهێنان لە عێراق، کوردستان، فەرەنسا. هاوکات 12 وەبەرهێنەری کورد لە کۆربەندەکە بەشدارن.

ئەوەی پێویستە بیزانیت: د. محەممەد شوکری، سەرۆکی دەستەی وەبەرهێنان بە نوێنەرایەتیی سەرۆکوەزیران مەسرور بارزانی، سەرۆکایەتیی شاندەکە دەکات، هەروەها لە کۆڕبەندەکەدا زیاتر لە 310 وەبەرهێنەر و بازرگان بەشدار دەبن کە زۆرینەیان فەرەنسین.

بۆچی گرنگە: کۆڕبەندەکە بۆ دروستکردنی پەیوەندییە لە نێوان وەبەرهێنەرانی فەرەنسا و هەرێمی کوردستان، بەشێک لە وەبەرهێنەران ئامانجیانە لە فەرەنسا ڕێککەوتن واژۆ بکەن.