لە زاخۆ گیانلەدەستدانی منداڵێک گومان لای دایک و باوکی دروست دەکات

ئاڤا نیوز

لە نەخۆشخانەیەکی زاخۆ منداڵێک لە ناو سکی دایکی گیانی لەدەستداوە، دایک و باوکی دەڵێن، بەهۆی هەڵەی پزیشکییەوە منداڵەکەمان مردووە.

چی ڕوویدا: 40 ڕۆژ پێش ئێستا، ئافرەتێکی دوو گیانی تەمەن 30 ساڵ چووە بۆ نەخۆشخانەی ئافرەتان و منداڵبوونی زاخۆ، ئازاری زۆر بووە، بە دکتۆرەکانی وتووە، با بە نەشتەرگەری منداڵەکەم ببێ، دکتۆرەکانیش وتوویانە بەسرووشتی باشترە بۆت و حەبێکیان پێی داوە، دوای ئەوەی حەبەکەی خواردووە، بە وتەی ئافرەتەکە، منداڵەکە لەناو سکی مردووەو بە مردوویی لەدایک بووە.

لێدوانی فەرمی: عومەر ئەحمەد باوکی منداڵەکە بە ئاڤای وت: سکاڵامان دژی دوو کارمەندی نەخۆشخانەکە تۆمار کردووە، ئەوە 40 رۆژیشە نەخۆشخانەکە هیچ وەڵامیکمان ناداتەوە.

بەدواداچوونی ئاڤا: جاسم محەمەد پەیامنیری ئاڤا بەهدینان چووە بۆ نەخۆشخانەی ئافرەتان و منداڵبوونی زاخۆ زانیارییان لێوەربگرێت لەسەر ئەم بابەتە، ئامادە نەبوون هیچ ڕوونکردنەوەیەک بدەن.