لیستی هاوكاریی مانگی 5ـی لیوا هاوبەشەكان ڕادەستی هاوپەیمانی نێودەوڵەتیی كرا

ئاڤا نیوز

لیستی هاوكاریی مانگی 5ـی لیوا هاوبەشەكانی پیادە، ڕادەستی هاوپەیمانیی نێودەوڵەتیی كرا و هەفتەی داهاتوو پارەكە دەگات، بەر لە جەژنی قوربانیش هاوكارییەكە دەخرێتە سەر هەژماری بانكیی پێشمەرگەكان و پارەکەیان وەردەگرن.

وێنە گەورەکە: بەپێی دوایین نوێكردنەوەی لیستی لیوا هاوبەشەكانی پێشمەرگە، نزیکەی 55 هەزار پێشمەرگە لەچوارچێوەی 15 لیوای هاوبەشدا لەساڵی 2017 ـەوە له‌ چوارچێوه‌ی وه‌زاره‌تی پێشمه‌رگه‌ ڕێكخراون، هاوکاری و پێداویستیی سەربازی لە هێزەکانی هاوپەیمانان وەردەگرن، ئێستا نزیكەی 85%ـی لیوا هاوبەشەكان لە سلێمانی و هەولێر و دهۆك، لەڕێگەی هەژماری بانكییەوە، هاوكارییەكەی هێزی هاوپەیمانانیان پێ دەدرێت.

زانیاریی بەدەستهاتوو: سەرچاوەیەك لە بەڕێوەبەرایەتیی ژمێریاریی وەزارەتی پێشمەرگە تایبەت بە ئاڤا ڕایگەیاند، دوێنێ یەكشەممە 2025-05-25، بەڕێوەبەرایەتیی گشتیی بودجە و بەرنامەکان لە وەزارەتی پێشمەرگە، ڕێکارە دارایی و ژمێریارییەکانی تەواوکرد و لیستی هاوكاریی مانگی پێنجی لیواكانی پیادەی ڕادەستی هاوپەیمانی نێودەوڵەتیی كرد.

زانیاریی زیاتر: بە وتەی ئەو سەرچاوەیە، بەئەگەرێكی زۆرەوە هەفتەی داهاتوو پارەی هاوكارییەكە دەگات و لەهەموو بارودۆخێكیشدا گەیشتن و دابەشكردنی هاوكاریی دارایی مانگانەی هاوپەیمانان لەنێوان دەستپێكی مانگ تاوەكو 10ـی مانگ دەبێت و هیچ مانگێك لەو وادەیە دواناكەوێت.

ئەوەی پێویستە بیزانیت: پاش ڕاوێژ و گفتۆگۆی ڕاوێژكارانی باڵای هاوپەیمانان لەگەڵ وەزیری پێشمەرگە، دوای ڕەزامەندیی سەرۆكایەتیی ئەنجوومەنی وەزیرانی هەرێمی كوردستان، بڕیاردرا ئەو بڕە هاوكارییەی كە لەلایەن هاوپەیمانانەوە دابین دەكرێت، ڕاستەوخۆ بخرێتە سەر هەژماری بانكیی وەزارەتی پێشمەرگە و لەو ڕێیەوە بڕی هاوكارییەكە وەك خۆی بەبێ دەستكاریكردن بدرێت بە لیوا هاوبەشەكانی وەزارەتی پێشمەرگە، كە بڕەكەی بۆ هەر پێشمەرگەیەك 214,871 هەزار دینارە، ئەم بڕە پارەیە مووچە نییە، مووچەی پێشمەرگەش لەگەڵ وەزارەتەكانی دیكە دابەش دەكرێت.