ئاگادارییەک لە وەزارەتی داراییەوە لەبارەی خانەنشینانی نوێ

ئاڤا نیوز

وەزارەتی دارایی ئاگاداری ئەو فەرمانگەکان دەکاتەوە کە بەخێرایی و بەبێ کەم و کوڕی مامەڵەی ئەو فەرمانبەرانەی خانەنشین بوون ڕادەستی بەڕێوەبەرایەتی خانەنشینی پارێزگاکان بکرێت.

وێنە گەورەکە: لە کۆی زیاتر لە 25 هەزار خانەنشین کە لەسەرەتای ئەمساڵەوە خانەنشین بوون، نزیکەی 15 هەزار فەرمانبەر ماون کە مامەڵەکانیان تەواو بکرێت و بخرێنە لیستی خانەنشینی، لەو ژمارەیە 9 هەزاریان لەو فەرمانگانانە ماون کە  پێشووتر خزمەتی وەزیفیان لێکردووە.

ڕاگەیێنراوی فەرمی: وەزارەتی دارایی و ئابووری لە ڕاگەیێنراوێکدا دەڵێت، ئەو خانەنشینانەی مامەڵەکانیان ڕەوانەی بەڕێوەبەرایەتییەکانی خانەنشینی نەکراوە، لە زووترین کاتدا و بە پێی شوێنی جوگرافی، بەبێ کەم و کوڕی و  دواکەوتن مامەڵەکانیان ڕەوانە بکەن.

دەقی ئاگادارییەکەی وەزارەتی دارایی:

لە چوارچێوەی هەوڵەکانی وەزارەتی دارایی و ئابووری و لەسەر ڕاسپاردەی جەنابی وەزیر چەندین ڕێکار و هەنگاوی پێویست بۆ خێرا ڕاییکردنی مامەڵەی خانەنشینان گیراونەتە بەر، لە چوارچێوەی ئەوەشدا داوا لەسەرجەم وەزارەت و فەرمانگەکانی نەبەستراو بە وەزارەت کراوە کە لەسەر بنەمای فۆڕمی زانیاری بەڕێوەبەرایەتی گشتی خانەنشین دۆسیەی ئەو فەرمانبەرانە ڕەوانە بکەن کە تەمەنی یاساییان لە خزمەت تەواو بووە و بەپێی یاسای خانەنشینی یەکگرتوی عێراق ڕەوانەی خانەنشینی دەکرێن.

لە ئەنجامی ئەو ڕێکارانەی لە دوو مانگی ڕابردوو گیرانەبەر توانراوە بۆ لیستی مووچەی مانگی ئایار (5،261) پێنج هەزار و دووسەد و شەست و یەک خانەنشینی نوێ داخڵی لیستی مووچە بکرێنەوە و ناوەکانیان ڕەوانەی وەزارەتی دارایی حکومەتی فیدراڵ کراوە، تا لەگەڵ مووچەی مانگی ئایار مووچەی مانگەکانی ڕابردووشیان بۆ خەرج بکرێتەوە بەپێی ئەو تەرخانەی لە ساڵی 2025 بۆیان جێگیرکراوە.